अक्षयच्या ट्विटवर दिया मिर्झा संतापली

मुंबई : रायगड माझा वृत्त 

पंतप्रधान नरेंद्र मोदी यांच्यासोबत बॉलिवूड प्रतिनिधी मंडळाची बैठक नुकतीच पार पडली. या बैठकीनंतर अभिनेता अक्षय कुमारने केलेल्या ट्विटनंतर दिया मिर्झाने यावर नाराजी व्यक्त केली आहे. या बैठकीला अक्षय कुमार, अजय देवगन यांच्यासह बॉलिवूड चित्रपट निर्मात्यांचा समावेश होता परंतु, यात एकाही महिलेचा समावेश नसल्याने दिया मिर्झानं संताप व्यक्त केलाय.

पंतप्रधानांसोबत झालेल्या बैठकीनंतर अक्षय कुमारने पंतप्रधानांचे आभार मानत एक फोटो ट्विट केला होता. अक्षयचे हे ट्विट रिट्विट करीत दिया मिर्झाने आपली नाराजी व्यक्त केलीय. @akshaykumar ला टॅग करीत दियानं म्हटंलय, हे चांगलं आहे! या बैठकीसाठी एकाही महिलेला सोबत घेतले नाही, यामागे काही खास कारण होते का?, असा सवाल तिनं अक्षयला विचारला आहे. दिया मिर्झासोबतच ‘लिपस्टिक अंडर माय बुर्का’ची दिग्दर्शक अलंकृता श्रीवास्तव यांनीही या प्रतिनिधीमंडळावर महिलेला सोबत न घेतल्यावरून प्रश्न उपस्थित केले आहेत.

पंतप्रधान मोदीसोबत झालेल्या या प्रतिनिधीमंडळाच्या बैठकीत अक्षय कुमार, अजय देवगन, रितेश सिद्धवानी, करण जोहर, सिद्धार्थ रॉय कपूर, राकेश रोशन, रॉनी स्क्रूवाला आणि सेन्सॉर बोर्डाचे अध्यक्ष प्रसून जोशी यांचा समावेश होता. या बैठकीत चित्रपट इंडस्ट्रीतील समस्यांवर चर्चा करण्यात आल्याची माहिती आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत