अपयशाची जबाबदारी पक्षाध्यक्षांचीच; गडकरींचा ‘बॉम्बगोळा’

रायगड माझा वृत्त

‘आमदार आणि खासदारांच्या सुमार कामगिरीची जबाबदारी ही पक्षाध्यक्षांचीच असते’, असं म्हणत भाजपचे ज्येष्ठ नेते आणि केंद्रीय मंत्री नितीन गडकरी यांनी नवा ‘बॉम्बगोळा’ टाकला आहे. गडकरींनी थेट भाजपच्या नेतृत्त्वावरच प्रश्न उपस्थित केल्याची चर्चा राजकीय वर्तुळात रंगली आहे. दिल्लीत आयबी अर्थात, गुप्तचर विभागाने एक कार्यक्रम आयोजित केला होता. या कार्यक्रमातील परिसंवादात सहभागी होताना गडकरी यांनी रोखठोक मतं मांडली. ‘मी पक्षाध्यक्ष असेन आणि माझ्या पक्षाचे आमदार, खासदार चांगली कामं करत नसतील तर त्याची जबाबदारी कुणाची असेल? ती माझीच असेल’, असं गडकरी म्हणाले. ‘माणसानं विनम्र असायला हवं. नाती जपायला हवीत. तुम्ही उत्तम वक्ते असलात म्हणून निवडणुकीत विजय मिळत नाही. तुम्ही विद्वान असलात म्हणून लोकं तुम्हाला मत देतीलच असं नाही. थोडा विचार केला तर आपल्याला ही चूक लक्षात येते. आत्मविश्वास आणि अहंकार यात हाच फरक असतो. आत्मविश्वास हवा पण अहंकाराला दूर ठेवा’, असं गडकरी म्हणाले. गडकरींच्या या वक्तव्याचा रोख थेट पंतप्रधान नरेंद्र मोदी व अमित शहा यांच्याकडंच असल्याचं बोललं जात आहे.

निवडणुकीतील विजय आणि पराभवाची जबाबदारी ही पक्षाच्या नेतृत्त्वाने स्वीकारली पाहिजे, असं वक्तव्य गडकरींनी काही दिवसांपूर्वीच केलं होतं. अर्थात, नंतर सारवासारव करून याचं खापर मीडियावर फोडलं. आपलं वक्तव्य मोडतोड करून मीडियाने समोर मांडलं, असं गडकरी म्हणाले होते. मात्र, त्याच्या नव्या वक्तव्यामुळं तर्कवितर्कांना उधाण आलं आहे. मध्य प्रदेश, राजस्थान आणि छत्तीसगडमधील भाजपच्या दारुण पराभवामुळे त्यांच्या वक्तव्याला अधिकच महत्त्व प्राप्त झालं आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत