आजच्या नेतृत्वात मत्सर, द्वेष: एकनाख खडसेंचे भाजपवर टीकास्त्र

मुंबई: महाराष्ट्र News 24 वृत्त 

नुकत्याच पार पडलेल्या विधानसभा निवडणुकीत आपल्याला तिकीट देण्यात आले नाही, त्यामागे राजकारण असल्याचे खडसे म्हणाले. रोहिणी खडसे या विधानसभा निवडणुकीसाठी तिकीट मागत नव्हत्या, तरीही त्यांना ते देण्यात आले, याकडे त्यांनी लक्ष वेधले. आपल्याला पक्षात अपमानास्पद वागणूक दिली जात असून आपला विश्वासघात केल्याचा आरोपही त्यांनी केला. गोपीनाथ मुंडे आज असते तर ही वेळ मुळीच आली नसती, अशी खंतही एकनाथ खडसे यांनी व्यक्त केली.

भारतीय जनता पक्षाच्या राज्य नेतृत्वावर उघडपणे टीकास्त्र सोडत नाराजी व्यक्त करणारे भारतीय जनता पक्षाचे ज्येष्ठ नेते एकनाथ खडसे यांनी आज गोपीनाथ मुंडे यांच्या जयंतीदिनी पुन्हा एकदा राज्यातील भाजप नेतृत्वावर टीकेची झोड उठवली आहे. भारतीय जनता पक्षाच्या आजच्या नेतृत्त्वामध्ये मत्सर आणि द्वेषभावना आहे, अशा शब्दांत खडसे यांनी भाजप नेतृत्वावर निशाणा साधला आहे.

गोपीनाथ मुंडे यांच्या जयंतीदिनी खडसे यांनी मुंडे यांच्या आठवणींना उजाळा दिला. गोपीनाथ मुंडे यांनी नेहमीच हसत-खेळत राजकारण केले असे खडसे म्हणाले. गोपीनाथ मुंडे हे सर्वसामान्य कार्यकर्त्यांचे आधार होते. ते पाठीत खंजीर खुपसणारे नव्हते, असे सांगत पंकजा मुंडे आणि रोहिणी यांच्या पराभवामागे षडयंत्र होते असा आरोपही त्यांनी पक्षातील लोकांवर केले. मुंडे यांच्या संघर्षामुळेच भारतीय जनता पक्षाला यश लाभले असेही ते पुढे म्हणाले.

भारतीय जनता पक्षातील इतर मागासवर्गीय समाजातील नेत्यांवर अन्याय होत असल्याची तक्रार खडसे काही दिवसांपासून करत आहेत. दरम्यानच्या काळात एकनाथ खडसे यांनी राष्ट्रवादी काँग्रेस पक्षाचे नेते शरद पवार यांची दिल्लीत भेट घेतली. त्यानंतर खडसे प्रचंड नाराज असून ते राष्ट्रवादी काँग्रेस पक्षात प्रवेश करतील अशी जोरदार चर्चा राजकीय वर्तुळात रंगली होती. त्यानंतर खडसेंनी पंकजा मुंडे यांची भेट घेतल्यानंतर त्यांनी मुख्यमंत्री उद्धव ठाकरे यांची भेट घेतल्याने अनेकांच्या भुवया उंचावल्या होत्या.

या बरोबरच मुंबईत नुकत्याच पार पडलेल्या भारतीय जनता पक्षाच्या कोअर कमिटीच्या बैठकीलाही एकनाथ खडसे आणि पंकजा मुंडे यांनी पाठ फिरवली होती. यानंतर १२ डिसेंबर या गोपीनाथ मुंडे यांच्या जयंतीदिनी होणाऱ्या कार्यक्रमात ते काय भूमिका घेतात याकडे सर्वांचे लक्ष लागले आहे.
शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत