आदित्य ठाकरे यांची शिवसेनेच्या नेतेपदी वर्णी 

रायगड माझा

युवासेनेची स्थापना करून तरुणाईला साद घालणाऱ्या शिवसेनेत पुन्हा एकदा युवा पर्वाला सुरुवात झाली आहे. युवासेनेचे प्रमुख आदित्य ठाकरे यांची शिवसेनेच्या नेतेपदी नियुक्ती करण्यात आली आहे. तर शिवसेनेचे नेते मनोहर जोशी आणि सुधीर जोशी यांचे नेतेपद कायम ठेवण्यात आले असून एकनाथ शिंदे यांचीही शिवसेनेच्या नेतेपदी नियुक्ती करण्यात आली आहे. वरळी येथील एनएसआयसीच्या पटांगणावर पार पडलेल्या शिवसेनेच्या राष्ट्रीय कार्यकारिणीच्या बैठकीत आदित्य यांच्या नियुक्तीवर शिक्कामोर्तब करण्यात आले.
वरळी येथे आज झालेल्या शिवसेनेच्या राष्ट्रीय कार्यकारिणीच्या बैठकीत पक्षांतर्गत मोठ्या प्रमाणावर फेरबदल करण्यात आले. यावेळी आदित्य यांची शिवसेना नेतेपदी नियुक्ती करतानाच मनोहर जोशी आणि सुधीर जोशी यांचे नेतेपद कायम ठेवण्यात आले आहे.  आजच्या बैठकीत सार्वजनिक बांधकाम (उपक्रम) मंत्री एकनाथ शिंदे यांचीही नेतेपदी वर्णी लागली आहे. त्याशिवाय चंद्रकांत खैरे आणि आनंदराव अडसूळ यांनाही नेतेपदी बढती देण्यात आली आहे. राज्यमंत्री गुलाबराव पाटील यांनी आदित्य ठाकरे यांच्या नावाची शिवसेना नेतेपदासाठी निवड झाल्याची घोषणा केली. त्यानंतर संपूर्ण सभागृहात जल्लोष झाला. तसेच जोरदार फटाके वाजण्यात आले. यावेळी केंद्रीय निवडणूक आयोगाचे मुख्य कार्यकारी अधिकारी अॅड. बाळकृष्ण जोशी यांनी निवडणुकीचे काम पाहिले. सध्या शिवसेनेत ८ नेते तर ३१ उपनेते आहेत. आदित्य ठाकरे सोडून कोणालाही नेतेपद नको, अशी मागणी शिवसेनेतील एका गटाने केली होती. त्यामुळे एकनाथ शिंदेंच्या नावाचा निर्णय होणार नसल्याचे सांगण्यात येत होते.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत