आर.के. स्टुडिओ इतिहासजमा होणार!

मुंबई : रायगड माझा ऑनलाईन 

भारतीय चित्रपटसृष्टीचा सुवर्णकाळ ज्या वास्तूने पाहिला, ज्या वास्तूला राज कपूर नावाच्या शोमनच्या कल्पकतेचा परीसस्पर्श झाला, तो आर.के. स्टुडिओ लवकरच इतिहासजमा होणार आहे. लवकरच हा स्टुडिओ विकायला काढण्याचा निर्णय कपूर कुटुंबीयांनी घेतला असल्याचे समजते. 

७० वर्षांपूर्वी दिवंगत अभिनेते राज कपूर यांनी चेंबूरमध्ये आर. के. स्टुडिओची स्थापना केली होती. बरसात, आवारा, बूट पॉलिश, जागते रहो, श्री ४२० असे एकाहून एक सरस चित्रपटांच्या निर्मितीचा हा स्टुडिओ साक्षीदार राहिला. राज कपूर आणि नर्गिस या जोडीचे अनेक सुपरहिट चित्रपट या स्टुडिओने दिले. हिंदी चित्रपटसृष्टीचा सुवर्ण काळ पाहिलेला हा स्टुडिओ जणू कपूर कुटुंबीयांचे दुसरे घरच झाले होते. मात्र, आता मात्र ही वास्तू इतिहासजमा होणार आहे.  हा स्टुडिओ विकायला काढण्याचा निर्णय कपूर कुटुंबीयांनी घेतला आहे.

चेंबूरमध्ये जवळपास दोन एकर भागात पसरलेल्या या स्टुडिओमध्ये गेल्या वर्षी भीषण आग लागली होती. त्यानंतर या वास्तूचे आणि त्यात संग्रहित केलेल्या वस्तूंचेही नुकसान झाले होते. त्यानंतर स्टुडिओमध्ये शूटिंग करण्यासाठी निर्माते येणेही कमी झाले होते. म्हणूनच आता हा स्टुडिओ विकणे योग्य ठरेल, असे मत अभिनेते ऋषी कपूर यांनी व्यक्त केले आहे. ‘संपूर्ण कुटुंबाशी चर्चा करून आणि एकमेकांच्या सहमतीनेच हा निर्णय आम्ही घ्यायचे ठरवले. कपूर कुटुंबीयांसाठी हा निर्णय घेणे तितके सोपे नव्हते,’ असेही ते म्हणाले.

गेल्या वर्षी स्टुडिओला आग लागल्यामुळे खूप नुकसान झाले होते. अशा परिस्थिती हा पांढरा हत्ती सांभाळण्यात अडचणी येत असल्याचे त्यांनी स्पष्ट केले.

आर. के. स्टुडिओच्या सुरुवातीच्या काळात बरेच चित्रपट येथे चित्रित व्हायचे. आता पूर्व उपनगरात निर्माते यायला तयार नाहीत कारण सगळेच पश्चिम उपनगरांमधील स्टुडिओमध्ये चित्रीकरण करतात. त्याचबरोबर स्टुडिओच्या देखभालीसाठी होणार खर्चही अवाक्याबाहेर गेल्याने कपूर कुटुंबीयांना हा निर्णय घ्यावा लागल्याचे कळते.

आगीमध्ये जळाल्या स्मृती 
आर. के. स्टुडिओमध्ये अनेक चित्रपटांच्या आठवणी जतन करवण्यात आल्या होत्या. त्यात अभिनेत्री नर्गिसपासून, वैजयंतीमाला ते अगदी ऐश्वर्या राय यांनी चित्रपटामध्ये परिधान केलेले पोशाख आणि दागिने ठेवण्यात आले होते. ‘मेरा नाम जोकर’मधील मुखवटा आणि ‘जिस गंगा बहती है’ या चित्रपटामधील बंदूकही होती. पण गेल्या वर्षी लागलेल्या आगीत या सगळ्या आठवणी नष्ट झाल्या होत्या.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत