उद्या रेल्वेच्या तिन्ही मार्गावर मेगाब्लॉक

मुंबई : रायगड माझा ऑनलाईन 

Image result for megablock

परळ उपनगरीय टर्मिनसच्या कामांसाठी भायखळा ते माटुंगा दरम्यान दहा तासांचा ब्लॉक रविवारी घेण्यात येणार आहे. ब्लॉकमुळे लोकल फेऱ्यांसह मुंबई-पुणे मार्गावरील प्राइम एक्स्प्रेसमधील प्रवाशांना फटका बसणार आहे. बोरिवली आणि भाईंदर स्थानकांदरम्यान पश्चिम रेल्वेने ब्लॉक घोषित केला आहे. यामुळे रविवारी मध्य आणि पश्चिम रेल्वे प्रवाशांचे मेगाहाल होण्याची शक्यता आहे.

भायखळा ते माटुंगा स्थानकादरम्यान डाऊन मार्गावर धीम्या मार्गावर सकाळी ९ ते सायंकाळी ६ पर्यंत पॉवर ब्लॉक घेण्यात येणार आहे. ब्लॉक काळात धीम्या मार्गावरील लोकल डाऊन जलद मार्गावर वळवण्यात येणार आहे. जलद लोकल थांब्याची व्यवस्था नसल्यामुळे चिंचपोकळी आणि करी रोड स्थानकावर ब्लॉक काळात कोणतीही लोकल उपलब्ध राहणार नाही. या स्थानकांत प्रवास करणाऱ्या प्रवाशांना परळ स्थानकातून प्रवास करण्याची मुभा देण्यात आली आहे. भविष्यातील पायाभूत सुविधांसाठी ट्रॅफिक आणि पॉवर ब्लॉक रविवारी घेण्यात येणार आहेत.

धावपटूंसाठी प्रतिष्ठित मानली गेलेली मुंबई मॅरेथॉन रविवारी होणार आहे. या स्पर्धेत सहभाग घेतल्यानंतर दमून घरी परतणाऱ्यांना या ब्लॉकमुळे त्रास होण्याची शक्यता आहे. ब्लॉक काळात डाऊन जलद मार्गावर लोकल वळवण्यात येणार असल्याने बहुतांश लोकल फेऱ्या विलंबाने धावण्याची शक्यता आहे. याच बरोबर सुमारे १०० पेक्षा जास्त लोकल फेऱ्या रद्द करण्यात येणार असल्याची माहिती रेल्वे सूत्रांनी दिली.

मुंबई-पुणे आणि मुंबई-नाशिक मार्गावरील प्राइम आणि गर्दीच्या मानल्या जाणाऱ्या एक्स्प्रेसला देखील ब्लॉकचा फटका बसणार आहे. रविवारी धावणाऱ्या ट्रेन क्रमांक ११०१०/११००९ पुणे-मुंबई-पुणे सिंहगड एक्स्प्रेस, १२१२४/१२१२३ पुणे-मुंबई-पुणे डेक्कन एक्स्प्रेस, २२१०२/२२१०१ मनमाड-मुंबई-मनमाड राज्यराणी एक्स्प्रेस आणि २२११०/२२१०९ मनमाड-मुंबई-मनमाड पंचवटी या एक्स्प्रेस रद्द राहणार आहेत.

दादर स्थानकातील लोकल फेऱ्यांच्या गर्दीचे विभाजन करण्यासाठी परळ उपनगरीय टर्मिनसची निर्मिती सुरू आहे. सद्यस्थितीत हे काम ९० टक्के पूर्ण झाले आहे. टर्मिनसच्या रुळांची जोडणी करण्यासाठी दोन टप्प्यात पूर्ण करण्यात येणार आहे. यापैकी रविवारी २० जानेवारी रोजी पहिल्या टप्प्यातील काम पूर्ण करण्यात येईल. ब्लॉक काळात रूट रिले इंटरलॉकिंग पॅनल देखील कार्यान्वित करण्यात येणार आहे.

पश्चिम रेल्वेवर ५ तासांचा ब्लॉक

रेल्वे रुळांची देखभाल दुरुस्ती करण्यासाठी बोरिवली ते भाईंदर स्थानकांदरम्यान सकाळी ११ ते दुपारी ३ वाजेपर्यंत अप आणि डाऊन जलद मार्गावर ब्लॉक घेण्यात येणार आहे. ब्लॉक काळात जलद लोकल फेऱ्या वसई रोड-विरार ते बोरिवली दरम्यान अप धीम्या मार्गावर आणि डाऊन लोकल फेऱ्या बोरिवली ते वसई रोड-विरार दरम्यान अप धीम्या मार्गावर वळवण्यात येणार आहे. असुविधा टाळण्यासाठी रविवारी ब्लॉक कालावधी लक्षात घेऊन प्रवास करावा, असे आवाहन पश्चिम रेल्वेने केले आहे.

मॅरेथॉनसाठी लोकलवेळेत बदल

मध्य-हार्बर रेल्वेवर शनिवार-रविवार पहाटे लवकर धावणाऱ्या लोकलच्या वेळेत बदल करण्यात आले आहेत.
मध्य मार्ग : मध्यरात्री ३ वा. कल्याण- सीएसएमटी (आधीची वेळ ४.४१)
हार्बर मार्ग : मध्यरात्री ३.१० वा. पनवेल-सीएसएमटी (आधीची वेळ ४.०३).

पश्चिम रेल्वेची विशेष लोकल

पहिली विशेष : मध्यरात्री २.४५ वा. विरार ते सीएसएमटी
दुसरी विशेष : मध्यरात्री ३.०५ विरार ते सीएसएमटी

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत