कुलभूषण जाधव यांच्या बदल्यात दहशतवादी सोपवण्याचा प्रस्ताव; पाकिस्तानचा दावा

पाकिस्तानच्या ताब्यात असलेले भारतीय नौदलाचे माजी अधिकारी कुलभूषण जाधव यांच्या बदल्यात २०१४ मध्ये पेशावरमध्ये शाळेवर हल्ला घडवणारा आणि अफगाणिस्तानच्या कैदेत असलेला दहशतवादी सोपवण्याचा प्रस्ताव मिळाला होता, असा दावा पाकिस्तानचे परराष्ट्र मंत्री ख्वाजा मुहम्मद असिफ यांनी केला आहे.

२०१४ मध्ये पेशावरमधील आर्मी पब्लिक स्कूलवर हल्ला करून मुलांची क्रूर हत्या करणारा दहशतवादी अफगाणिस्तानच्या कैदेत आहे. त्यावेळी राष्ट्रीय सुरक्षा सल्लागारांनी कुलभूषण जाधव यांच्या बदल्यात दहशतवादी देण्यासंबंधी प्रस्ताव ठेवला होता, असा दावा असिफ यांनी ‘एशिया सोसायटी’मध्ये उपस्थितांना संबोधित करताना केला आहे. यावेळी त्यांनी दहशतवादी आणि प्रस्ताव ठेवणाऱ्या राष्ट्रीय सुरक्षा सल्लागारांच्या नावांचा उल्लेख केला नाही.

भारतीय नौदलाचे माजी अधिकारी जाधव यांना पाकिस्तानी लष्करी न्यायालयाने हेरगिरीचा आरोप आणि दहशतवादी कारवायांमध्ये सामील असल्याच्या आरोपाखाली फाशीची शिक्षा सुनावली आहे. जाधव यांना राजनैतिक मदत देण्यात यावी, अशी भारताने अनेकदा मागणी केली होती. मात्र पाकिस्तानने ती मागणी मान्य केली नाही, असे भारताने म्हटले आहे. दरम्यान, आंतरराष्ट्रीय न्यायालयाने १८ मे रोजी या प्रकरणावर सुनावणी करताना जाधव यांच्या फाशीच्या शिक्षेला स्थगिती दिली आहे. पाकिस्तानसाठी हा मोठा झटका असल्याचे मानले जाते.

 

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत