गुजरातमध्ये हल्ल्यांची भीती कायम; राजकारणही तापले

अहमदाबाद : रायगड माझा वृत्त 

चौदा महिन्यांच्या एका चिमुकलीवर बिहारी मजुराने बलात्कार केल्याच्या घटनेनंतर गुजरातमध्ये उत्तर भारतीयांविरोधात निर्माण झालेला संताप शमण्याची चिन्हे नसून, हल्ले होत असल्याने उत्तर भारतीय गुजरात सोडून आपापल्या राज्यांमध्ये परतत असल्याचे सत्र सुरूच आहे. या मुद्द्यावरून आता राजकारणही तापू लागले आहे.

स्थानिकांकडून धमक्या येत असल्याने उत्तर भारतीय मजूर रेल्वे, बस अशा मिळेल मार्गांनी आपल्या राज्यांकडे परतत आहेत. अशा पलायन केलेल्या मजुरांची संख्या आता ६० हजारांवर पोहोचली असल्याचे उत्तर भारतीय विकास परिषद या संघटनेचे अध्यक्ष श्याम सिंह ठाकूर यांनी सांगितले. मजुरांच्या रक्षणासाठी पोलिसांनी औद्योगिक क्षेत्रांमधील गस्त वाढवली असून, बडोद्यात तर शेकडो पोलिसांनी ध्वजसंचलनही केले. परप्रांतीयांवरील हल्ल्यांप्रकरणी आतापर्यंत ६१ गुन्हे दाखल करण्यात आले असून, एकूण ५३३ जणांना अटक करण्यात आली आहे. त्याशिवाय सोशल मीडियावर चिथावणीखोर संदेश पसरवल्याबद्दल माहिती व प्रसारण तंत्रज्ञान कायद्याखाली वेगळे सात गुन्हे दाखल झाले असून, वीसजणांना अटक करण्यात आली आहे. अशी माहिती गृह राज्यमंत्री प्रदीपसिंह जडेजा यांनी दिली.

रुपानींची राहुल यांच्यावर टीका

गुजरातमधील सध्याच्या घटनांना तेथील बेरोजगारीच कारणीभूत असल्याचा आरोप काँग्रेस अध्यक्ष राहुल गांधी यांनी केला होता. त्यावरून गुजरातचे मुख्यमंत्री विजय विजय रुपानी यांनी, ‘काँग्रेस आधी हिंसा भडकवते आणि नंतर हिंसेच्या विरोधात टीका करते. काँग्रेसला काही लाज आहे की नाही?’ असे प्रत्युत्तर मंगळवारी दिले. ‘या हिंसेत काँग्रेसचे आमदार अल्पेश ठाकोर आणि त्यांच्या गुजरात क्षत्रिय ठाकोर संघटनेचा हात आहे. राहुल गांधी त्यांच्यावर खरेच कारवाई करतील का?,’ असे रुपानी म्हणाले.

दरम्यान, असे हल्ले हा भयानक प्रकार असून, गुजरातमधील भाजप सरकार ते रोखण्यात अपयशी ठरल्याचे पश्चिम बंगालच्या मुख्यमंत्री ममता बॅनर्जी म्हणाल्या तर, ‘जेथे आहेत तेथेच ठाम रहा. बिहारचे उच्चपदस्थ अधिकारी गुजरातमधील आपल्या समपदस्थांशी संपर्कात आहेत’, असे आवाहन बिहारचे मुख्यमंत्री नितीशकुमार यांनी गुजरातमधील बिहरींना केले आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत