गेलेल्या मुलीच्या वाढदिवशी ‘त्यांनी’ वाचवले २ जीव

रायगड माझा विशेष वृत्त :

अमरावतीतील उमेश आणि अश्विनी सावरकर या डॉक्टर दाम्पत्याने गेल्या वर्षी डिसेंबर अखेरीस आपली चिमुकली मुलगी गमावली. चार वर्षांच्या मीराचा एका अपघातात मृत्यू झाला. तिच्या मृत्यूनंतर तिचे अवयव दान करण्याचा त्यांनी आटोकाट प्रयत्न केला, पण ‘ब्रेन डेड’ मीराचा अवयव दानाच्या प्रक्रियेपूर्वीच मृत्यू झाल्याने तेही शक्य झालं नाही. या घटनेनंतर आठ महिन्यांनी मीराच्या वाढदिवशी २१ ऑगस्टला या दाम्पत्याने दोन मुलांच्या हार्टसर्जरींसाठी आर्थिक मदत देऊन मुलीला वाढदिवस साजरा केला.

चार वर्षांची पायल पराते आणि पाच वर्षीय अस्वशील ढवळे यांच्या हृदयाला छिद्र असल्याचे निदान झाल्याने त्यांच्यावर तत्काळ शस्त्रक्रियेची गरज होती. सावरकर दाम्पत्याने केलेल्या आर्थिक मदतीतून या मुलांवर शस्त्रक्रिया करण्यात आल्या.

‘मीराचे अवयव इतर मुलांचा जीव वाचवू शकले असते. पण ते आमच्या हातातही नव्हतं आणि नशीबातही. त्यामुळेच आम्ही पैशांअभावी खूप काळ शस्त्रक्रियेची वाट पाहणाऱ्या मुलांना मदत करण्याचा निर्णय घेतला,’ असं उमेश यांनी सांगितलं. उमेश हे स्त्रीरोगतज्ज्ञ असून अश्विनी पॅथलॉजिस्ट आहेत. अमरावतीतील श्री संत अच्युत महाराज हार्ट हॉस्पिटलमधील पायल आणि अस्वशील यांना या डॉक्टर दाम्पत्यामुळे जीवदान मिळाले आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत