चंद्रपुरात बिबट्याच्या हल्ल्यात बौद्ध भिक्खूचा मृत्यू

चंद्रपूर : रायगड माझा वृत्त 

 

रामदेगी हिंदू आणि बौद्ध धर्मीयांचे श्रद्धास्थान असलेले स्थळ आहे. या ठिकाणी बौद्ध अनुयायी मोठ्या प्रमाणावर येतात. पहाडावर बौद्ध विहार बांधण्यात आले आहे. तसेच त्या ठिकाणी भन्ते निवास असल्याने मोठ्या प्रमाणात भन्ते राहतात. सोनेगाव वन येथील राहुल वाळके हेसुद्धा चिवर धारण करून भिक्‍खू संघात सामील झाले होते. भिक्खू संघात सामील झाल्यानंतर त्यांचे राहुल बोधी असे नामकरण करण्यात आले. राहुल बोधी बौद्ध पद्धतीप्रमाणे ४० दिवसाच्या धुतांग अधिष्ठानाकरिता विहाराच्या दूर एका झाडाखाली नेहमीप्रमाणे बसले होते. मंगळवारी सकाळी दहाच्या सुमारास दबा धरून बसलेल्या बिबट्याने पाठीमागून त्यांच्यावर हल्ला केला. बराच वेळ झाला राहुल भन्ते अद्याप आले नाही. त्यामुळे भन्ते धम्मपाल आणि वनविभागाचे काही कर्मचारी नवेगाव रस्त्यालगत असलेल्या झुडपाकडे गेले. तेव्हा त्यांचा मृतदेह तेथे दिसून आला.

परिसरात भीतीचे वातावरण

वनाने व्यापलेला चंद्रपूर जिल्हा असून कधी वन्यजीवांच्या क्षेत्रात मानव जातो, तर कधी वन्यजीव मानव वस्तीत यायला लागला आहे. त्यातूनच मानव -वन्यजीव संघर्ष पेटत आहे. पर्यटनास्थळालगत सदर घटना घडल्याने परिसरात भीतीचे वातावरण आहे. या भागात गस्त वाढविण्यात आली असून गावकऱ्यांनी जंगलात न जाण्याच्या सूचना देण्यात आल्या आहेत.

सात वर्षांत २६५ हून अधिक गावकऱ्यांचा बळी 

विदर्भात वाघ-बिबट्यांची संख्या मोठी आहे. त्यातच बछड्यांची संख्यादेखील पोषक वातावरणामुळे वाढत आहे. पण जागा अपुरी पडतेय. त्यामुळे विदर्भाला त्याचा सर्वाधिक फटका बसत आहे. परिणामी वन्यजीवांच्या हल्ल्यात राज्यात मागील सात वर्षात २६५हून जास्त गावकऱ्यांचा बळी गेला आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत