जम्मू-काश्मीर: नॅशनल कॉन्फरन्सच्या कार्यकर्त्यांवर दहशतवादी हल्ला,२ ठार

श्रीनगर : रायगड माझा वृत्त 

श्रीनगर शहरातील करफल्ली परिसरात दहशतवाद्यांनी केलेल्या गोळीबारात नॅशनल कॉन्फरन्सचे दोन कार्यकर्ते ठार झाले आहेत तर एक कार्यकर्ता गंभीर जखमी झाला आहे. या हल्ल्यामागे कोणत्या संघटनेचा हात आहे हे मात्र अजून स्पष्ट झालं नसून पोलीस पुढील तपास करत आहेत.

आठ ऑक्टोबरला काश्मीरमध्ये ग्राम पंचायत आणि काही नगरपालिकांच्या निवडणुका आहेत. या निवडणुकांसाठीच नॅशनल कॉन्फरन्सचे कार्यकर्ते नाझीर अहमद भट आणि मुश्ताक अहमद वाणी प्रचार करत असल्याचं समजतं. अचानक येऊन घटनास्थळी दहशतवाद्यांनी गोळीबार केला आणि पलायन केलं. नाझीर आणि मुश्ताक जागीच ठार झाले तर त्यांचा सहकारी शकील गंभीर जखमी झाला आहे. त्याच्यावर जवळच्या रुग्णालयात उपचार सुरू आहेत

पंचायत निवडणुकांदरम्यान दहशतवादी घातपात करण्याची शक्यता आधीच इंटिलिजन्स एजन्सीच्या सूत्रांनी वर्तवली होती. या पार्श्वभूमीवर झालेला हा हल्ला झाल्यामुळे पोलिसांनी राज्यातील सुरक्षेत अधिक वाढ करण्याचा निर्णय घेतला आहे.

ओमार अब्दुल्लांनी केला निषेध

नॅशनल कॉन्फरन्सचे नेते ओमार अब्दुल्ला यांनी या हल्ल्याचा निषेध केला आहे. तसंच मृत कार्यकर्त्यांना श्रद्धांजली वाहिली आहे.

दरम्यान काश्मीरमधील फुटीरतावादी संघटनांनी निवडणुकांवर बहिष्कार टाकला असून ८ ऑक्टोबरला काश्मीर बंदची घोषणा केली आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत