जवान सुनील ढोपे यांच्या मृत्यूप्रकरणी आज वाशीम बंद !

वाशीम : रायगड माझा ऑनलाईन ।

सीमा सुरक्षा दलाचे जवान सुनील ढोपे यांच्या मृत्यूप्रकरणाची उच्चस्तरीय चौकशी करून त्यांना शहीद घोषित करावे या मागणीसाठी मंगळवारी सर्वपक्षीय जिल्हा बंद पाळण्यात आला. कारंजा शहरात सलग दुसऱ्या दिवशाही प्रतिसाद मिळाला. सकाळपासून बाजारपेठ, शाळा बंद ठेवण्यात आल्या. वाहतूक बंद असल्याने बस स्थानकावर शुकशुकाट होता. मंगरूळपीरमध्ये रास्तारोको करून सर्वपक्षीय मोर्चा काढण्यात आला. संघटनांनी निवेदने देत चौकशीची मागणी केली. नेते, अधिकारी यांनी मध्यस्थीचा प्रयत्न केला. पण, ढोपे कुटुंबीय न्यायाच्या मागणीवर ठाम राहिल्याने दुसऱ्या दिवशीही सुनील यांच्या पार्थिवावर अंत्यसंस्कार होऊ शकले नाही. दरम्यान, शिवसेनेने आज, बुधवारी वाशीम बंदची हाक दिली आहे.

कारंजा येथील जवान सुनील ढोपे यांचा मेघालयातील शिलाँग येथे कर्तव्य बजावित असताना १५ सप्टेंबरला मृत्यू झाला. दोन दिवसांनंतर दुपारी ३ वाजता त्यांचे पार्थिव कारंजा येथे आले. परंतु, जवान ढोपे यांचा मृत्यू घातपाताने झाल्याचा आरोप करीत ढोपे कुटुंबीयांनी पार्थिव ताब्यात घेण्यास नकार दिला. सोमवारी रात्री १० वाजता पार्थिव अमरावती येथे शीतगृहात हलविण्यात आले. मंगळवारी जिल्हा सैनिक अधिकारी आर. एम. तरडे, जिल्हा पोलिस अधीक्षक मोक्षदा पाटील यांनी कारंजा गाठून ढोपे यांच्या कुटुंबीयांची समजूत काढण्याचा प्रयत्न केला. आधी न्याय द्या, नंतरच मुतदेह ताब्यात घेऊ या मागणीवर ढोपे कुटुंबीय ठाम राहिल्याने ही चर्चा नि:ष्फळ ठरली. सायंकाळी पाचच्या सुमारास माजी राज्यमंत्री गुलाबराव गावंडे यांनी संवाद साधला़ मात्र, ढोपे यांच्या मृतदेहावर अंत्यसंस्कार करण्यावर तोडगा निघू शकला नाही. याशिवाय सीमा सुरक्षा दलाचे काही उच्च पदस्थ अधिकारी येणार होते. उशिरापर्यंत ते शहरात दाखल झाले नव्हते. त्यामुळे दुसऱ्या दिवशीही जवान ढोपे यांच्या पार्थिवावर अंत्यसंस्कार होऊ शकले नाही. दरम्यान, सोमवारी खासदार भावना गवळी, आ. राजेंद्र पाटणी, माजी आमदार प्रकाश डहाके, भारिप नेते मो. युसूफ पुंजानी यांनी भेटी दिल्या.

‘माझे पती आत्महत्या करूच शकत नाहीत’

मृत्यूपूर्वी माझ्या पतीला जीवे मारण्याच्या धमक्या मिळत होत्या. त्यांना नोकरी सोडून घरी परत या म्हटले तर ते मी पळपुटेपणा करणार नाही, असे म्हणायचे. काहीही झाले तरी मी आत्महत्या कदापि करणार नाही, असा त्यांनी मला शब्द दिला होता. त्यामुळे माझे पती आत्महत्या करूच शकत नाहीत, असा ठाम विश्वास जवान सुनील ढोपे यांच्या पत्नी सविता ढोपे यांनी व्यक्त केला आहे. सहा महिन्यानंतर एकदा ते सुटीवर घरी यायचे. त्यांची येण्याची मी सहा महिने वाट पाहायची आता मी कुणाची वाटू पाहू, माझ्या मुला-बाळांचे कसे होईल, माझ्या पतीला न्याय मिळावा असेही सविता म्हणाल्या.

वाहतूक सेवा ठप्प

मंगळवारी सकाळच्या सत्रात महाराष्ट्र राज्य मार्ग परिवहन महामंडळाच्यावतीने बससेवा सुरळीत होती. मात्र सकाळी ११ वाजतानंतर सर्वपक्षीय नेते, कार्यकर्ते बाजारपेठ बंद करण्यासाठी रस्त्यावर उतरले. त्यानंतर अवघ्या काही वेळातच बससेवा बंद करण्यात आली. कारंजा आगार व बाहेरगावाहून आलेल्या बसेस आगारात रोखण्यात आल्या. काही बसेस बायपास मार्गे पुढील प्रवासासाठी वळत्या करण्यात आल्या. या बंदमुळे कारंजा आगाराच्या अनेक बसफेऱ्या रद्द झाल्या़

रास्तारोको, निवेदने

जवान सुनील ढोपे यांना शहीद घोषित करावे या मागणीसाठी मंगळवारी युवकांनी मंगरुळपीर रस्त्यावर शेतकरी भवनासमोर काही वेळ रास्तारोको आंदोलन केले. पोलिसांच्या हस्तक्षेपानंतर हे आंदोलन मागे घेण्यात आले. त्यानंतर शहरातून सर्वपक्षीय मोर्चा काढण्यात आला. रिसोडच्या नगराध्यक्षा भारती क्षीरसागर, माजी नगराध्यक्ष किरण क्षीरसागर यांनी तहसीलदार देवळे यांना निवेदन दिले. जमीत उलेमा ए हिंद संघटनेच्यावतीने स्वाक्षऱ्यांचे निवेदन कारंजा तहसीलदारांमार्फत केंद्रीय गृहमंत्री राजनाथसिंग यांना पाठविण्यात आले.

चौकशी समिती नियुक्त

जवान सुनील ढोपे यांच्या मृत्यूसंदर्भात चौकशी करण्यासाठी सीमा सुरक्षा दलाच्या विशेष महानिदेशक अरूणकुमार यांनी सोमवारी एक सदस्यीय चौकशी समिती नियुक्ती केली आहे. समितीने अविलंब आवश्यक ती कारवाई करावी असे या पत्रात स्पष्ट केले आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत