जेटच्या कॉकपिटमध्ये शिरले घुबड

मुंबई : रायगड माझा ऑनलाईन 

आर्थिक चणचणीमुळे चर्चेत असलेल्या जेट एअरवेज सोमवारी एका वेगळ्या कारणाने चर्चेत आले. एअरवेजच्या छत्रपती शिवाजी महाराज आंतरराष्ट्रीय विमानतळावर उभ्या असलेल्या विमानाच्या कॉकपिटमध्ये चक्क एक घुबड शिरले. हे घुबड वैमानिकाच्या आसनासमोर थाटात आसनस्थ झाले होते.

मुंबईच्या विमानतळावर विविध कंपन्यांच्या विमानांचा तळ आहे. या विमानांची पहिल्या दोन स्तराची दुरुस्तीही अनेकदा विमानतळावरच होते. त्यामध्येच जेट एअरवेजचाही समावेश आहे. कंपनीच्या विमानांचा कुर्ल्याकडील बाजूने तळ आहे. तेथे उभ्या असलेल्या एका बोइंग ७७७ विमानाच्या कॉकपिटमध्ये दुपारी घुबड बसल्याचे तंत्रज्ञांच्या निदर्शनास आले. या विमानाची उड्डाणपूर्व प्राथमिक दुरुस्ती सुरू असताना ही घटना घडली. तंत्रज्ञांनी तत्काळ अधिकाऱ्यांना माहिती दिली. त्यानंतर या घुबडाला पकडून सुरक्षित ठिकाणी सोडण्यात आले.

कॉकपिट हा विमानातील अत्यंत संवेदनशील भाग असतो. तसे असताना तिथपर्यंत हे घुबड पोहोचलेच कसे, असा प्रश्न उपस्थित होत आहे. प्रत्यक्षदर्शींनुसार, हे घुबड नेमके कधीपासून कॉकपिटमध्ये बसून होते, याबाबत माहिती नाही. पण तंत्रज्ञांनी दुरुस्ती व स्वच्छतेसाठी कॉकपिटच्या काचा उघडल्या त्यावेळी हे घुबड आत आले असावे, असा संशय व्यक्त केला जात आहे. त्यातून घुबडाचा रंग हा कॉकपिटच्या रंगासारखाच होता. यामुळे हे रंग बदलणारे घुबड होते का, अशीही चर्चा विमानतळावर रंगली होती.

मटणाची दुकाने कारणीभूत

घुबड हा सस्तन प्राण्यांची शिकार करणारा पक्षी आहे. प्रामुख्याने जिवंत मासे व मांसाचे तुकडे तो खातो. विमानतळाच्या भिंतीला लागून असलेल्या अवैध व उघड्यावरील मटणाच्या दुकानांकडे आकर्षित होऊन हे घुबड तेथे आले असावे, असा संशय आहे. जेटचे विमान ज्या कुर्ल्याकडील भागात उभे होते, तेथील भिंतीला लागून मोठ्या प्रमाणात अशी अवैध व उघड्यावरील मटण दुकाने आहेत. विमानतळाच्या भिंतीपासून १० नॉटिकल माइलपर्यंत उघड्यावर मटणाचे दुकान शॉप असू नये, असा ‘डीजीसीए’चादेखील नियम आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत