तुम्ही गे आहात काय? रक्तदात्यांना होणार विचारणा

मुंबई : रायगड माझा वृत्त 

रक्तदान करण्यासाठी गेलेल्या रक्तदात्याला साधारणपणे तुम्ही आजारी आहात काय? तुम्हाला कोणता गंभीर आजार आहे काय? यापूर्वी गंभीर आजार झाला होता काय? तुम्ही आतापर्यंत किती वेळा रक्त दिलं आहे? असे प्रश्न विचारले जातात. पण यापुढे मात्र रक्तदात्याला आणखी एक प्रश्न विचारला जाणार आहे आणि तो म्हणजे ‘तुम्ही गे आहात काय?’… घाबरू नका. हा प्रश्न तुम्हाला सर्वांसमोर विचारला जाणार नाही. तर एका फॉर्मवर हा प्रश्न विचारला जाणार आहे. एखाद्या पुरुषाचे अनेक पार्टनर तर नाहीत ना? याची खातरजमा करण्यासाठीच हा प्रपंच केला जाणार आहे.

नॅशनल ब्लड ट्रान्स्फ्युजन काऊंसिल या संस्थेने मुंबईतील रक्त पेढ्यांना ऑक्टोबर २०१७ मध्ये एक अपडेटेड फॉर्म दिला आहे. त्यात रक्तदात्यांच्या निवडीबाबत काही मार्गदर्शक सूचना करण्यात आल्या आहेत. त्यात गे आणि बाय-सेक्स्युअल पुरुष, ट्रान्सजेंडर आणि देहविक्रय करणाऱ्या महिला कधीच रक्तदान करू शकत नाहीत, असं नमूद करण्यात आलं आहे.

या लोकांमध्ये एचआयव्ही आणि हेपिटायटीस-‘बी’ आणि ‘सी’ची लागण होण्याची शक्यता अधिक असते. त्यामुळे इतर रुग्णांच्या जीवाला धोका संभवू शकतो, असं या अर्जात नमूद करण्यात आलं आहे. त्याशिवाय कर्करोग, ऑर्गन फेल्युअर, अॅलर्जी आणि श्वसनविकाराचा आजार असलेल्या रुग्णांना रक्तदान करण्याची परवानगी देण्यात आलेली नाही. मात्र विकसित देशातील नियमांच्या आधारे हे नियम तयार करण्यात आल्याचं रक्तपेढ्यांच्या कर्मचाऱ्यांचं म्हणणं आहे.

या आधी तुम्हाला कावीळ, मलेरिया आणि एड्ससारखे आजार होण्याची शक्यता आहे काय? असा प्रश्न रक्तदात्याला विचारला जात होता. आता नव्या अर्जामध्ये तुम्हाला मल्टीपल सेक्स पार्टनर आहेत का? तुम्हाला गे पार्टनर आहेत का? असे प्रश्न विचारण्यात आले आहेत. रक्तदात्यांना असे प्रश्न विचारणं कठिण असतं. पण रुग्णांची योग्य माहिती असणंही तितकच गरजेचं आहे. विकसित देशांमध्येही असे प्रश्न विचारले जातात, असं एका अधिकाऱ्याने सांगितलं.
शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत