दिवा-पनवेल-वसई मार्ग उपनगरीय मार्ग म्हणून घोषित

मुंबई : रायगड माझा वृत्त

मुंबई महानगर प्रदेशातील महत्त्वाचा भाग असलेल्या मात्र आजवर दुर्लक्षिल्या गेलेल्या वसई रोड ते पनवेल या पट्ट्यातील प्रवाशांना निवडणुकांच्या पार्श्वभूमीवर अखेर रेल्वे मंडळाने दिलासा दिला आहे. वसई रोड-दिवा आणि दिवा-पनवेल हा मेमू मार्ग उपनगरीय मार्ग म्हणून घोषित करण्याचा निर्णय रेल्वे मंडळाने घेतला आहे. यामुळे मेमू मार्गावरील प्रवाशांना रिटर्न तिकीट, टूरिस्ट तिकीट या सुविधांचा लाभ मिळणार आहे. विशेष म्हणजे, या निर्णयामुळे भविष्यात या मार्गावर लोकल चालवण्याचा सर्वात मोठा अडथळा दूर झाला आहे.

घरांच्या कमी किंमती, रेल्वे स्थानकापासून जवळ घर यामुळे वसई रोड-दिवा आणि दिवा-पनवेल मार्गालगत गेल्या काही वर्षांत झपाट्याने नागरीकरण झाले. यातच सध्याच्या मेमू ठराविक वेळेत धावत असून त्यांच्या फेऱ्याही मर्यादित आहेत. मुंबई प्रदेशात असून देखील मेमू मार्ग असल्याने प्रवाशांना मुंबई उपनगरीय मार्गावरील सुविधांपासून वंचित राहावे लागत होते.

उपनगरीय मार्ग
मध्य रेल्वेने ५ नोव्हेंबर २०१८ आणि १२ फेब्रुवारी २०१९ मध्ये वसई-दिवा आणि दिवा-पनवेल मार्ग उपनगरीय मार्गाबाबत प्रस्ताव पाठवला होता. अखेर रेल्वे मंडळाच्या नियोजन विभागाने कायमस्वरुपासाठी मेमू मार्ग उपनगरीय मार्ग म्हणून घोषित केला आहे. याबाबतचे लेखी आदेश मध्य रेल्वेचे महाव्यवस्थापक देवेंद्र कुमार शर्मा यांना देण्यात आले. त्यानुसार महाव्यवस्थापकांनी संबंधित विभागाला मुंबई लोकल स्थानकावरील सुविधा वसई रोड ते पनवेल मार्गावरील स्थानकांत उपलब्ध करण्याबाबत सूचना दिल्याची माहिती मध्य रेल्वेचे मुख्य जनसंपर्क अधिकारी सुनील उदासी यांनी दिली. दिवा-पनवेल आणि वसई-दिवा या मार्गांवर एकूण १४ रेल्वे स्थानके असून यात दोन्ही मार्गांवरील प्रत्येकी सात स्थानकांचा समावेश आहे. मुंबई उपनगरीय रेल्वे मार्गात छत्रपती शिवाजी महाराज टर्मिनस ते कसारा/कर्जत मध्य मार्ग, छत्रपती शिवाजी महाराज टर्मिनस ते वाशी/पनवेल हार्बर मार्ग, चर्चगेट ते विरार/डहाणू रोड पश्चिम मार्ग यांचा समावेश आहे. याचबरोबर दिवा-पनेवल, वसई-दिवा मार्ग या मेमू मार्गाचा देखील समावेश उपनगरीय मार्गात करण्यात येणार आहे. सध्या मेमूच्या २४ फेऱ्या चालवल्या जातात.

या मिळणार सुविधा
दिवा-पनेवल, वसई-दिवा मार्गादरम्यान सर्व रेल्वे स्थानकांवर प्रतीक्षालय, संगणकीकृत प्रवासी उद्घोषणा यंत्रणा, वेळापत्रक फलक, वॉटर व्हेंडिंग मशीन, वाहनतळ आणि स्थानकालगत मोकळा परिसर, फलाटांवर बैठक सुविधा, एलईडी दिवे, शौचालय-स्वच्छतागृह, फलाटांवरील छप्पर, पादचारी पूल, सरकते जिने या सुविधा उपलब्ध करण्यात येणार आहे.

फलाटांची उंची वाढवणार
मेमू ताशी ४० ते ५० किमी प्रतितास, तर लोकल ताशी १०० किमी प्रतितास या वेगाने धावते. मेमूच्या डब्याची लांबी ३,२४५ मिलीमीटर, तर लोकलच्या डब्याची लांबी ३,६६० मिलिमीटर असते. मेमू मार्गावरील फलाटांची उंची लोकल मार्गाच्या तुलनेत कमी असते. त्यामुळे लोकल फेऱ्या सुरू करण्याआधी दिवा-पनेवल, वसई-दिवा मार्गावरील सर्व स्थानकांतील फलाटांची उंची वाढवावी लागणार आहे. हे काम लवकरच सुरू करण्यात येणार असल्याची माहिती रेल्वे अधिकाऱ्यांनी दिली.

स्थानक प्रवासी संख्या (प्रति वर्ष) 
दिवा ४.१ कोटी
निळजे रोड ४.९ लाख
तळोजा ३.२५ लाख
नावडे रोड ०.८३ लाख
कळंबोली ०.४६ लाख
कोपर ८७.४ लाख
भिवंडी रोड ३२.६ लाख
खारबाव १.७ लाख
जूचंद्र ०.८३ लाख

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत