धक्कादायक; धारावीत आई आणि मुलीची हत्या

मुंबई : रायगड माझा वृत्त

धारावीच्या डायमंड अपार्टमेंटमध्ये राहणाऱ्या ३५ वर्षीय तेहसीन झेहरा सय्यद आणि त्यांची दोन वर्षांची मुलगी आलिया यांचा मृतदेह गुरुवारी घरातच सापडला. दोघींवरही चाकूने वार करून त्यांना जाळण्याचा प्रयत्न केला गेला. हे हत्याकांड असल्याचा संशय असून याप्रकरणी शाहूनगर पोलिसांनी महिलेच्या पतीसह काही संशयितांना चौकशीसाठी ताब्यात घेतले आहे.

धारावीच्या शाहूनगरमधील डायमंड अपार्टमेंटच्या दहाव्या मजल्यावरील फ्लॅटमध्ये तेहसीन या पती आणि दोन मुलींसह राहत होत्या. गुरुवारी सकाळी साडेदहाच्या सुमारास अकराव्या आणि बाराव्या मजल्यावरील रहिवाशांच्या घरात खिडकीतून धूर येऊ लागला. आग लागली असावी, या भीतीने त्यांनी इमारतीखाली धाव घेतली असता, दहाव्या मजल्यावरील सय्यद यांच्या फ्लॅटमधून धूर येताना दिसला. यावेळी तेहसीन यांचा पती इलियास हादेखील जवळच होता. रहिवाशांनी त्याच्यासह दहाव्या मजल्यावर जाऊन त्याच्याकडील चावीने दरवाजा उघडला. त्यावेळी तेहसीन आणि आलिया या दोघी स्वयंपाकघरात रक्ताच्या थारोळ्यात पडल्या होत्या. दोघींच्याही अंगावरील कपड्यांनी पेट घेतला होता. रहिवाशांनी घरातील कपड्यांच्या साहाय्याने दोघींच्या अंगावरील आग विझवली. पण तोपर्यंत फार उशीर झाला होता. चाकूने गळा कापल्याने रक्तस्त्राव झाल्यामुळे दोघींचा जागीच मृत्यू झाला होता.

घटनेची माहिती मिळताच, शाहूनगर पोलिस आणि गुन्हे शाखेचे पथक घटनास्थळी पोहोचले. दोघींचे मृतदेह रुग्णालयात शवविच्छेदनासाठी रुग्णालयात पाठविण्यात आले. प्राथमिक तपासामध्ये ही आत्महत्या नसून हत्या असल्याचा अंदाज पोलिसांनी व्यक्त केला आहे. यामागे कौटुंबिक कलह, संपत्ती वाद यांच्यासारखे अनेक तर्क व्यक्त करण्यात येत असून चौकशीसाठी पती इलियास यांच्यासह काही संशयितांना चौकशीसाठी ताब्यात घेतले आहे. घटनास्थळी चाकू सापडलेला नाही. शवविच्छेदन अहवालानंतर पुढील कारवाई करण्यात येईल, असे पोलिसांनी सांगितले.

शाळेत गेल्याने मोठी मुलगी बचावली 
आलिया हिची मोठी बहीण समाना ही साडेचार वर्षांची असून ती धारावीतील एका इंग्रजी माध्यमाच्या शाळेत ज्युनियर केजीमध्ये शिकते. तेहसीन आणि आलिया या दोघींना मारण्यात आले, त्यावेळी समाना शाळेत गेली असल्याने बचावली, असे येथील रहिवाशांनी सांगितले. इलियास हा वडिलांचा जरीकामाचा व्यवसाय चालवतो. त्याच्या तिन्ही बहिणी विवाहीत आहेत, अशी माहितीही रहिवाशांनी दिली.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत