धनगर समाजाच्या आमदाराने पंकजांना अडवलं, जाब विचारला

रायगड माझा वृत्त

धनगर समाजाच्या आरक्षणाचा तिढा सुटत नाही तोवर मंत्रालयाची पायरी चढणार नाही, असं जाहीर वक्तव्य करणाऱ्या राज्याच्या ग्रामविकास मंत्री पंकजा मुंडे यांनी आज मंत्रालयात झालेल्या राज्य मंत्रिमंडळाच्या बैठकीला उपस्थिती लावली. त्यामुळे पंकजा मुंडे आपल्या भूमिकेवरून पलटल्याची टीका धनगर समाजाच्या आमदारांनी केली आहे.

धनगर समाजाचे नेते आणि विधानपरिषदेचे आमदार रामराव वडकुते यांनी पंकजा मुंडे यांना यावेळी मंत्रालयात प्रवेश करताना अडवलं आणि जाब विचारला. ‘तुम्ही धनगर समाजाची फसवणूक करत आहात. आज शब्द बदलून मंत्रालयाची पायरी चढला आहात. पण २०१९ नंतर धनगर समाज तुम्हाला मंत्रालयात येण्याची वेळच येऊ देणार नाही’, असं रामराव वडकूते यांनी म्हटलं आहे.

पंकजा मुंडे यांनी नांदेडमध्ये धनगर आरक्षण जागर परिषदेत उपस्थिती लावली होती. या सभेत पंकजा मुंडे यांनी भाषणात उपस्थितांना धनगर समाजाला आरक्षण मिळाल्याशिवाय परत मंत्रालयात प्रवेश करू शकणार नाही, याचा विश्वास असल्याचं जाहीर वक्तव्य केलं होतं. पण आज मंत्रालयात झालेल्या मंत्रिमंडळ बैठकीला पंकजा मुंडे उपस्थित होत्या. पंकजा यांना याबाबत विचारलं असता ‘मी मंत्रालयाची पायरी चढणार नाही असं विधान केलंच नव्हतं’, अशी प्रतिक्रिया दिली आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत