नीरव मोदीचा अलिबागमधील किहिम येथील बंगला सुरुंग लावून उडवणार

अलिबाग: रायगड माझा वूत्त

पंजाब नॅशनल बँक (PNB) घोटाळा प्रकरणातील फरार आरोपी नीरव मोदीचा अलिबागमधील किहिम समुद्रकिनाऱ्यालगतचा ३० हजार चौरस फुटांवरील अलिशान बंगला शुक्रवारी सकाळी डायनामाइटनं उद्ध्वस्त करण्यात येणार आहे. हा बंगला जमीनदोस्त करण्याची तयारी रायगड जिल्हा प्रशासनानं सुरू केली आहे.

नीरव मोदीच्या बंगल्यातील टाइल्स आणि प्लास्टर मंगळवारी यंत्राच्या मदतीनं उखडून काढले आहे. आरसीसी खांबांमध्ये ड्रिलिंग मशीनच्या साह्यानं छिद्रे पाडून त्यात डायनामाइट पेरण्यात येणार आहेत. रायगडचे जिल्हाधिकारी डॉ. विजय सूर्यवंशी यांनी ‘डिमॉलिशन मॅन’ अतिरिक्त जिल्हाधिकारी भरत शितोळे यांच्याकडे पाडकामाची जबाबदारी सोपवली आहे. त्यांच्या देखरेखीखाली नीरव मोदीचा बंगला डायनामाइटनं उद्ध्वस्त केला जाणार आहे. शितोळे यांनी २००० आणि २००१ मध्ये भाईंदरमधील ४० अनधिकृत इमारती स्फोटकांनी उद्ध्वस्त केल्या होत्या. बंगला पाडण्याचे काम मंगळवारीही दिवसभर सुरू होतं. शितोळे हे दिवसभर त्यावर लक्ष ठेवून होते.

‘सध्याच्या बाजारभावानुसार नीरव मोदीच्या या अलिशान बंगल्याची किंमत २५ कोटी रुपये आहे. बांधकामासाठी उच्च दर्जाच्या सिमेंटचा वापर करण्यात आला आहे. त्यामुळं खोदकाम यंत्राच्या साह्यानं बंगला जमीनदोस्त करण्यात अडचणी येत आहेत,’ असं माहिती अधिकार कार्यकर्ते दिलीप जोग यांनी सांगितलं.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत