नेरळ रेल्वे स्थानकात लवकरच सरकत्या जिन्याची उभारणी

मध्य रेल्वेचे नेरळ स्थानक हे महत्वाचे रेल्वे स्थानक म्हणून ओळखले जाते, माथेरानला जाण्यासाठी जगभरातील पर्यटक नेरळ स्थानकातून जात असतात , त्यामुळे नेरळ स्थानक हे माथेरानचाच एक भाग असल्याने नेरळ स्थानकाला मोठे महत्त्व प्राप्त झाले आहे. अशा नेरळ स्थानकात सुविधांचा मात्र वानवा आहे. नेरळ रेल्वे स्थानकात काही वर्षा पूर्वी मुंबई कडील पुलाच्या कामाला सुरुवात केली होती. त्या करिता  दोन्ही फलाटवर खांब सुद्धा उभे केले आहेत परंतु त्या नंतर  काम थांबले ते आजपर्यंत. यापुलाचे काम कधी पूर्ण होईल याबाबत सातत्याने प्रवाशांकडून विचारणा होत आहे.

याबाबत पुलाचे  काम कधी पूर्ण होईल? अशी विचारणा कर्जतचे रेल्वे प्रवाशांच्या समस्या सोडविण्यासाठी पुढाकार घेणारे सामाजिक कार्यकर्ते पंकज मांगीलाल ओसवाल यांनी रेल्वे प्रशासनास केली. त्यावर रेल्वे प्रशासनाने सदर पुलाचे काम ठेकेदाराशी वाद विवाद झाल्यामुळे रखडले आहे असे उत्तर  देण्यात आले आहे. मात्र आनंदाची बाब अशी की नेरळ स्थानकात उभारलेल्या नवीन पुलाच्या मुंबईकडील बाजूस सरकता जिना होणार असून त्याबाबत येत्या तीन – चार महिन्यात निविदा निश्चित करण्यात येणार असल्याचे रेल्वे प्रशासनाने कळविले आहे..