पैशांचा पाऊस; तुरुंगात भागणार हौस!

रायगड माझा वृत्त

पैशांचा पाऊस पाडण्याचे आमिष दाखवत महिलेशी शारीरिक संबंध प्रस्थापित करण्याचा प्रयत्न करणाऱ्या भोंदूबाबा व त्याच्या दोघा साथीदारांना निफाड पोलिसांनी अटक केली. संशयितांविरोधात महाराष्ट्र नरबळी इतर अमानुष अनिष्ट व जादूटोणा प्रतिबंधक कायदा २०१३ कलम ३ भादंवि ३४ अन्वये गुन्हा दाखलकरण्यात आला आहे.

या प्रकारात फिर्यादी महिलेने जीवावर उदार होऊन या प्रकारचा भांडाफोड करण्यासाठी प्रयत्न केला. यात तिला तिचे साथीदार अंधश्रद्धा विरोधात काम करणारे आणि छत्रपती सेनेचे तुषार गवळी, तानाजी शेलार, नीलेश शेलार, धीरज खोळंबे (रा. राणेनगर, नाशिक) यांनी महत्त्वाची साथ दिली. पीडित महिलेने पैशांचा पाऊस पाडण्याचा प्रकार आणि पूजेसाठी स्वतःला मागणी घातल्याची बाब आपल्या साथीदारांना सांगितली आणि या प्रकाराचा पर्दाफाश करण्याची योजना आखली.

याबाबत पीडित महिलेने निफाड पोलिस स्टेशनला फिर्याद दिली. या महिलेची आणि संशयित भोंदूबाबा योगेश नागरे याची प्रसाद जाधव याने निफाड येथे १२ जानेवारी रोजी शिवपार्वती लॉन्स येथे भेट घडवून आणली. या भेटीत बाबाने महिलेला शुद्धीकरण विधी व पूजा याची माहिती देऊन १३ जानेवारीला बोलावले. ही बाब महिलेने साथीदारांना सांगितली. यानंतर पीडित महिला प्रसाद जाधव आणि डॉ. योगेश सोनार यांच्यासह नाशिक येथून निफाड येथे आले. शिवपार्वती लॉन्सजवळ बाबाच्या अल्टो गाडी (एमएच १४, ईएक्स १५७९) मध्ये पीडित महिला व बाबा हे बसले. बाबा आपल्यासोबत काहीतरी वाईट करणार हे लक्षात आल्याने महिलेने तिच्या सहकाऱ्यांना एसएमएस केला. ही बाब सहकाऱ्यांनी पोलिसांना कळवली. भोंदूबाबाला व उपस्थितांना पोलिस स्टेशनमध्ये घेऊन गेल्यानंतर त्या ठिकाणी या सर्व प्रकारची माहिती पीडित महिलेने सांगितली. त्यानुसार पोलिसांनी या प्रकरणी निफाड तालुक्यातील दोघांसह नाशिकमधील एकास ताब्यात घेतले. योगेश नागरे (शिवरे, ता. निफाड), योगेश सोनार (पवननगर, सिडको, नाशिक) प्रसाद जाधव (टाकळी विंचूर, ता. निफाड) या तिघांना सोमवारी पहाटे पीडित महिलेच्या फिर्यादीवरून पोलिसांनी ताब्यात घेतले.

नेमके घडले काय?
ओळखीतल्या प्रसाद जाधव याने निफाड येथे एक बाबा पैशांचा पाऊस पाडतो, त्याला पूजेसाठी एका मुलीची गरज आहे, तुम्ही मदत कराल का, अशी विचारणा संबंधित महिलेला केली होती. या महिलेचा फोटो काढून बाबाला मोबाइलवर पाठवित नंतर भेटही घडवून आणली. यावेळी भोंदूबाबा योगेश नागरेने महिलेला सांगितले, की एक जीन येऊन आपल्याला पैसे देईल. त्यासाठी तुझे शुद्धीकरण करावे लागेल. तुला सुरुवातीला जीनसोबत व नंतर माझ्याशी शारीरिक संबंध ठेवावे लागतील. त्यासाठी लॉजवर जाऊ, तेथे जीन तुझ्याशी शारीरिक संबंध केल्यानंतर तुला हवे तितके पैसे देईल. ते सर्व आपण आपसात वाटून घेऊ असे सांगत महिलेला उत्तेजक द्रव्याच्या गोळ्यांची पुडी दिली. ही माहिती संबंधित महिलेने आपल्या सहकाऱ्यांना एसएमएसद्वारे कळवली. त्यांनी पोलिसांना कळवत या प्रकरणाचा भांडाफोड केला.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत