प्रिया दत्त लोकसभा निवडणूक लढणार नाहीत

मुंबई : रायगड माझा वृत्त

उत्तर मध्य मुंबई लोकसभा मतदार संघाच्या माजी खासदार, काँग्रेसच्या नेत्या प्रिया दत्त यांनी येणारी लोकसभा निवडणूक न लढण्याचा निर्णय घेतला आहे. आपला हा ठाम निर्णय त्यांनी पक्षाध्यक्ष राहुल गांधी यांना ईमेल द्वारे कळवला आहे. यात त्यांनी निवडणूक न लढण्याच्या कारणांची चर्चाही केली आहे.

दिवंगत अभिनेते आणि काँग्रेसचे नेते सुनील दत्त यांच्या निधनानंतर प्रिया दत्त दोन वेळा उत्तर मध्य मुंबई लोकसभा मतदारसंघातून निवडून आल्या. गेल्या २०१४च्या लोकसभा निवडणुकीत भाजपच्या पूनम महाजन यांनी प्रिया दत्त यांचा मोठ्या फरकाने पराभव केला. या पराभवानंतर प्रिया दत्त सार्वजनिक कार्यक्रमांमध्ये फारशा दिसल्या नाहीत. तेव्हापासूनच त्या येणारी निवडणूक लढणार नाहीत, असा अंदाज व्यक्त होऊ लागला होता. ऑल इंडिया कांग्रेसच्या सचिवपदाचा राजीनामा दिल्यानंतर तर त्यांची निवडणूक न लढण्याची शक्यता अधिक बळकट झाली.

तथापि, प्रिया दत्त यांनी काँग्रेस पक्षाला सोडचिठ्ठी देण्याचा वा राजकीय सन्यास घेण्याबाबत कोणतीही घोषणा केलेली नाही. गरज भासल्यास आपण पक्षाचा प्रचार करू, असा उल्लेख त्यांनी राहुल गांधी यांना पाठवलेल्या ईमेलमध्ये केला आहे. ईमेलमध्ये त्यांनी राहुल गांधी आणि सोनिया गांधी यांचे आभार मानले आहेत.

आपल्या ९ वर्षांच्या राजकीय कारकिर्दीत आपण चांगले काम करण्याचा प्रयत्न केल्याचा उल्लेखही त्यांनी ईमेलमध्ये केला आहे. निवडणूक न लढवताही आपण जनतेची चांगली सेवा करू शकतो, असे आपल्याला वाटत असल्याचेही त्यांनी नमूद केले आहे. यापुढे मी माझ्या १३ आणि ११ वर्षांच्या मुलांना माझा वेळ देणार आहे, असा संकल्पही त्यांनी केला आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत