बिस्वाल यांच्या पेंटिंगला ५ लाख

नागपूर : रायगड माझा वृत्त

शहरातील प्रसिद्ध चित्रकार बिजय बिस्वाल यांनी पंतप्रधान नरेंद्र मोदींच्या काढलेल्या पेंटिंगचा अलीकडेच ५ लाख रुपयांमध्ये लिलाव करण्यात आला. नरेंद्र मोदी यांना पंतप्रधान या नात्याने भेट म्हणून मिळालेल्या वस्तूंचा लिलाव करण्यात येत असून, यात बिस्वाल यांनी काढलेले चित्र सर्वाधिक किमतीत विकले गेले आहे. या लिलावातून मिळणारा सर्व पैसा हा ‘नमामी गंगे’ या प्रकल्पासाठी लावला जाणार आहे.

मोदी यांना पंतप्रधान म्हणून मिळालेल्या वस्तूंचा दिल्ली येथील ‘नॅशनल गॅलरी ऑफ मॉडर्न आर्ट’ येथे लिलाव केला जात आहे. यातून मिळालेला सर्व पैसा हा ‘नमामी गंगे’ या प्रकल्पासाठी वापरला जाणार आहे. सोमवारी हा लिलाव सुरू झाला. यात सुमारे २ हजार वस्तू लिलावासाठी ठेवण्यात आलेल्या आहेत. याखेरीज उर्वरित अन्य वस्तूंचा लिलाव हा ऑनलाइन पद्धतीने केला जाणार आहे. ३१ जानेवारीपर्यंत हा लिलाव चालणार आहे. सोमवारी झालेल्या लिलावातून एकूण ८ कोटी रुपयांची रक्कम उभी झाली आहे. यात बिस्वाल यांचे पेंटिंग तसेच लाकडाद्वारे तयार करण्यात आलेली एक मोटरसायकल सर्वाधिक किमतीला विकली गेली.

याबाबत बिजय बिस्वाल यांना संपर्क साधला असता ते म्हणाले, ‘२०१५ साली पंतप्रधान मोदी यांनी ‘मन की बात’मध्ये माझ्या कार्याची विशेषत: रेल्वेवरील चित्रांची स्तुती केली होती. त्यामुळे त्यांना ‘रिटर्न गिफ्ट’ देण्याच्या हेतूने मी हे चित्र रेखाटले होते. ‘भिजलेल्या रेल्वे प्लॅटफॉर्मवरून मोदी चालत आहेत,’ असे चित्र मी रेखाटले होते. जुलै २०१५ मध्ये मी हे चित्र रेखाटले. पुढे मला नोव्हेंबर २०१६ मध्ये त्यांच्या भेटीची संधी मिळाली. तेव्हा मी त्यांना हे चित्र भेट म्हणून दिले होते. त्यांना मिळालेल्या सगळ्या भेटवस्तूंचा दिल्ली येथील ‘नॅशनल गॅलरी ऑफ मॉडर्न आर्ट’ येथे लिलाव केला जात आहे. यात लाकडाद्वारे तयार करण्यात आलेली एक मोटरसायकल आणि माझे चित्र हे तब्बल ५ लाख रुपयांचा विकले गेले. आतापर्यंत विकल्या गेलेल्या वस्तूंमध्ये ही सर्वांत मोठी किंमत आहे. हे चित्र त्यांच्याकडे पडले राहण्यापेक्षा ते विकले गेले आणि मुख्यत्वे हा पैसा गंगा शुद्धीकरणासाठी लागणार आहे, याचा सार्थ अभिमान मला आहे.’

बिस्वाल रेल्वेविभागातून ३१ मार्च २०१७ रोजी निवृत्त झाले. पंतप्रधानांची छबी चितारून त्यांनी निरोपाचा क्षण साजरा केला. बिलासपूरनजीकच्या कोरबा रेल्वेस्थानकावर त्यांनी हे चित्र काढले होते. पंतप्रधान मोदी रेल्वेस्थानकावर प्रवासी सामानासह उभे असलेले जलरंगातील हे चित्र आहे. सोशल मीडियातून ते बरेच व्हायरल झाले. ‘मै तो फकीर आदमी हू, …झोली उठाके चले जाऊंगा,’ या मोदींच्या वाक्यासह अनेकांनी ते चित्र व्हायरल केले. माहिती व प्रसारण राज्यमंत्री राज्यवर्धन राठोड यांनी ट्विट करून बिस्वाल यांच्या कलात्मक निवृत्तीचित्राची दखल घेतली होती.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत