ब्राझीलला हरवून बेल्जियम उपांत्य फेरीत

कझान: वर्ल्डकपचा प्रबळ दावेदार समजला जाणाऱ्या ब्राझीलला बेल्जियमने उपांत्यपूर्व फेरीतच२-१ने गारद केलं आहे. यामुळे वर्ल्डकप जिंकण्याचं नेमारचं स्वप्न भंगलं आहे तर बेल्जियमने उपांत्य फेरीत धडक मारली आहे.


कझान शहरातील मैदानावर खेळल्या गेलेल्या या सामन्यात सुरुवातीला दोन्ही संघांकडून आक्रमक खेळी केली जात होती. पण १३व्या मिनिटाला बेल्जियमच्या एडन हजार्डने बॉलला किक मारली असता तो अडवण्याच्या नादात ब्राझीलच्या फर्नांन्डिनोच्या खांद्याला लागून सरळ ब्राझीलच्या गोलपोस्टमध्ये शिरला. ब्राझीलच्या खेळाडूच्या या चुकीमुळे बेल्जियमने १-० ने आघाडी घेतली. त्यानंतर बेल्जियमच्या केव्हीन डी ब्रुनेने ३३व्या मिनिटाला गोल डागून बेल्जियमची खेळावरील पकड अधिकच घट्ट केली. मध्यंतरापर्यंत ब्राझीलला एकही गोल
करता आला नाही. मध्यतरानंतर ७८व्या मिनिटाला ब्राझीलसाठी रेनोटो ऑगोस्टोने पहिला गोल केला.पण त्यानंतर एकही गोल करण्यात ब्राझीलला यश आलं नाही. निर्धारीत ९० मिनिटांचा खेळ संपला तेव्हा बेल्जियम २-१ने आघाडी कायम ठेवली होती.त्यानंतर ५ मिनिटांचा स्टॉपेज टाइम देँण्यात आला. यातही ब्राझीलला गोल करण्यात यश आलं नाही.

आज बेल्जियमने उत्कृष्ट खेळाचं प्रदर्शन करत उपांत्य फेरीत धडक मारली आहे. आतापर्यंत एकदाही बेल्जियमने वर्ल्डकप जिंकला नाहीये. त्यामुळे पाचदा वर्ल्डकप जिंकणाऱ्या ब्राझीलसारख्या बलाढ्य संघाला धुळ चारल्यानंतर त्यांच्या विश्वचषक जिंकण्याचा आशा उंचावल्या आहेत.

तर ब्राझीलच्या पराभवामुळे नेमारच्या चाहत्यांची मात्र निराशा झाली आहे. ब्राझीलही स्पर्धेतून बाहेर पडल्यामुळे यंदा फिफा वर्ल्डकप कोण जिंकणार याबद्दलची उत्सुक्ता मात्र अधिकच वाढली आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत