भाजप-मनसेत रंगलं कार्टून वॉर

मुंबई : रायगड माझा वृत्त 

लोकसभा निवडणूक जसजशी जवळ येतेय, तसतसे राजकीय वातावरण तापताना दिसत आहे. महाराष्ट्र नवनिर्माण सेनेचे अध्यक्ष राज ठाकरे यांनी व्यंगचित्राच्या माध्यमातून भाजप सरकारच्या कारभारावर प्रहार करण्यास सुरुवात केली आहे. राज ठाकरे यांच्या टीकेला भाजपनं त्यांच्याच भाषेत प्रत्युत्तर देण्यास सुरुवात केल्यानं सध्या दोन्ही पक्षांमध्ये कार्टून वॉर रंगलं आहे.

अवनी वाघिणीच्या मृत्यूचा विषय चांगलाच चर्चेत आहे. हाच धागा पकडून राज ठाकरे यांनी बुधवारी दोन व्यंगचित्रं रेखाटली होती. सोशल मीडियावर व्हायरल झालेल्या या व्यंगचित्रांमध्ये शिवसेना भाजप युती, भाजप सरकार आणि अवनी वाघिणीच्या मृत्यूवर तिरकस भाष्य करण्यात आलं होतं. पहिल्या व्यंगचित्रात मुख्यमंत्री फडणवीस अवनी वाघिणीवर बंदूक रोखून उभे आहेत. तर वनमंत्री सुधीर मुनगंटीवार इशारा करीत आहेत. शिवसेना पक्षप्रमुख उद्धव ठाकरे या दोघांच्या मागे उभे राहून बघ्याच्या भूमिकेत असल्याचं दाखवण्यात आलंय. फडणवीस यांनी रोखलेल्या बंदुकीवर ‘माज’ असं लिहिलं होतं. दुसऱ्या व्यंगचित्रात २०१९ चा उल्लेख होता व त्यातील वाघावर महाराष्ट्र असं कोरलं होतं. हा वाघ फडणवीस आणि उद्धव यांना गिळंकृत करताना दाखवला होता. येत्या निवडणुकीतील युतीच्या संभाव्य स्थितीचं चित्रण राज यांनी यातून केलं होतं.

भाजपनं राज यांच्या या टीकेला व्यंगचित्रानंच उत्तर दिलं आहे. एका व्यंगचित्रात तीन चित्रे दर्शवण्यात आली आहेत. यामध्ये राज ठाकरे व्यंगचित्र रेखाटण्यात दंग असून, कार्यकर्ते त्यांच्याशी संवाद साधत आहेत. पहिल्या चित्रात लोकसभा निवडणूक, दुसऱ्या चित्रात विधानसभा निवडणुकांचा उल्लेख आहे. तर तिसऱ्या चित्रात निवडणुकांच्या निकालाचा उल्लेख आहे. ‘राज ठाकरे कार्टूनिस्ट आहेत की कार्टून?’ असा बोचरा सवाल यातून करण्यात आलाय. राज आता भाजपला कसं उत्तर देतात, हे पाहणं महत्त्वाचं ठरणार आहे.
शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत