भारत पुराव्याशिवाय आम्हाला दोष देतोय : पाकिस्तान

नवी दिल्ली : रायगड माझा ऑनलाईन 

Image result for jammu kashmir news

जम्मू-काश्मीरमधील पुलवामा येथे झालेल्या आत्मघाची हल्ल्याचा तीव्र शब्दांत निषेध करत अनेक देशांनी भारताला पाठिंबा दर्शवला आहे. पाकिस्ताननेही या हल्ल्याचा निषेध करताना हल्ल्याशी संबंधित आपल्यावरील आरोपांचे खंडन केले आहे. हल्ल्यानंतर पाक परराष्ट्र मंत्रालयाने एका प्रसिद्धी पत्रकाद्वारे निषेध नोंदवत भारताने आणि भारतातील प्रसारमाध्यमांनी पुराव्याविनाच पाकला लक्ष्य केल्याचे म्हटले आहे.
पाकिस्तानने प्रसिद्धी पत्रकात म्हटले आहे, ‘भारतव्याप्त काश्मीरमधील पुलवामा येथे झालेला हल्ला हा चिंतेचा विषय आहे. जगभरात कुठेही झालेल्या हिंसेचा आम्ही नेहमीच निषेध केला आहे. याबरोबरच कोणताही तपास न करताच या हल्ल्याशी पाकिस्तानचा संबंध जोडणारी भारतीय प्रसारमाध्यमे आणि भारत सरकारच्या आरोपांचे आम्ही खंडन करत आहोत.’
या हल्ल्यानंतर भारताने जैश-ए-मोहम्मद आणि आणि मसूद अजहर यांच्यावर प्रतिबंध लावण्याची संयुक्त राष्ट्रांकडे मागणी केली आहे. संयुक्त राष्ट्रांच्या सर्वच सदस्यांनी मसूद अजहर याला दहशतवादी घोषित करण्याबरोबरच त्याच्या मुसक्या आवळण्याच्या प्रस्तावाचे समर्थन करावे असे आवाहनही भारताने केला आहे.
घटनेस जबाबदार असणाऱ्यांना सोडणार नाही : संयुक्त राष्ट्र

संयुक्त राष्ट्रांनीही या हल्ल्याचा तीव्र शब्दात निषेध केला आहे. याबरोबरच शहिदांच्या कुटुंबीयांप्रती सहवेदनाही प्रकट केली आहे. हल्ल्यात जखमी झालेले सर्व जवान लवकरच बरे होतील अशी सदिच्छाही संयुक्त राष्ट्रांनी व्यक्त केली आहे. या हल्ल्याला जबाबदार असणाऱ्यांना लवकरात लवकर कोर्टात उभं करण्यात येईल, असेही संयुक्त राष्ट्रांनी म्हटलं आहे.

आम्ही भारतासोबत आहोत : अमेरिका

भारतातील अमेरिकेचे राजदूत केनेथ जस्टर यांनी ट्विट करत अमेरिका या हल्ल्याचा निषेध करत असल्याचे म्हटले आहे. दहशतवादाचा मुकाबला करण्यासाठी, तसेच त्याचा बिमोड करण्यासाठी अमेरिका भारताच्या सोबत आहे अशा शब्दांत अमेरिकेतील वरिष्ठ खासदारांनी हल्ल्याचा निषेध करत म्हटले आहे. शहिदांच्या कुटुंबीयांच्या दु:खात आपण सहभागी असल्याचेही अमेरिकेने म्हटले आहे. याबरोबरच रशिया, फ्रान्स आणि जर्मनीनेही या हल्ल्याचा निषेधे केला आहे. ऑस्ट्रेलियानेही या हल्ल्याबाबत नाराजी व्यक्त केली आहे.

आम्ही भारतीय मित्रांसोबत : इस्रायल

इस्रायलचे राजदूत डॉ. रॉन माल्का यांनी ट्विट करत पुलवामा येथे झालेल्या दहशतवादी हल्ल्याचा इस्रायल तीव्र शब्दात निषेध केला आहे. अशा कठीण समयी आम्ही आमचे मित्र राष्ट्र भारतासोबत आहोत असे सांगत इस्रायने सीआरपीएफ आणि शहीद जवानांच्याकुटुंबीयांच्या कुटुंबीयां प्रती सहवेदना प्रकट केली.

बांगलादेशही भारतासोबत

अशा दु:खद प्रसंगी आम्ही भारताच्या सोबत असल्याचे बांगलादेश सरकारने म्हटले आहे. या हल्ल्यात ज्यांनी आपल्या प्रियजनांना गमावले आहे, अशा शहिदांच्या कटुंबीयांसोबत आम्ही दु:खी आहोत. हल्ल्यात जखमी झालेले जवान लवकर बरे होवोत अशी आम्ही प्रार्थना करतो अशा शब्दात बांगलादेशने आपला पाठिंबा व्यक्त केला आहे.

श्रीलंकेच्या माजी राष्ट्रपतींकडून निषेध

मी या हल्ल्याचा तीव्र शब्दात निषेध करत आहे. यात अनेक जवान शहीद झाले. मी शहिदांच्या कुटुंबीयांप्रती सहवेदना प्रकट करतो. संपूर्ण जगाला दहशतवादाविरोधात लढत राहायला हवे, अशा शब्दांत श्रीलंकेचे माजी राष्ट्रपती महिंदा राजपक्षे यांनी हल्ल्याचा निषेध केला आहे.

नेपाळच्या पंतप्रधानांचा मोदींना फोन

नेपाळचे पंतप्रधान के. पी. शर्मा यांनी या हल्ल्यानंतर पंतप्रधान नरेंद्र मोदी यांच्याशी फोनद्वारे चर्चा केली. याबरोबरच त्यांनी पुलवामा हल्ल्यात शहीद झालेल्या जवानांप्रती सहवेदना प्रकट केली.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत