महापरिनिर्वाण दिन: हजारो पावले चैत्यभूमीकडे

मुंबई : रायगड माझा वृत्त
भारतरत्न डॉ. बाबासाहेब आंबेडकर यांच्या महापरिनिर्वाण दिनानिमित्त त्यांना अभिवादन करण्यासाठी चैत्यभूमीकडे भीमाच्या लेकरांची पावले वेगाने वळू लागली आहेत. प्रत्येक वर्षाप्रमाणे केवळ मुंबईतूनच नव्हे तर देशाच्या कानाकोपऱ्यातून लेकराबाळांसह हे जथ्थे बाबासाहेबांना अभिवादन करण्यासाठी आले आहेत. डोक्यावर सामानाची गाठोडी घेऊन मजलदरमजल करत मुलाबाळांना घेऊन हे जथे चैत्यभूमीकडे जात आहेत.

मंगळवारी मध्यरात्रीपासून दादर रेल्वेस्थानकाच्या परिसरामधील गर्दी वाढू लागली आहे. प्रत्येक वर्षी चैत्यभूमीला न चुकता येणाऱ्यांसह नव्या पिढीतील तरुणही उत्सुकता, कुतूहलाच्या भावनेने मुंबईमध्ये दाखल झाले आहेत. झेंडे, फिती, बाबासाहेबांचे फोटो असलेले बिल्ले कौतुकाने घेऊन ‘जय भीम’च्या घोषणा देत ही गर्दी चैत्यभूमीकडे जाताना दिसत आहे. गर्दीमध्ये लहान मुले वा इतर कुणीही हरवू नये याचीही काळजी घेण्यात येणार आहे. त्यासाठी पालिकेसह पोलिसांनी विशेष आराखडा तयार केला आहे.

महापरिनिर्वाणदिनाच्या आदल्या दिवशी मुंबईमध्ये येणाऱ्यांना मार्गदर्शन करण्यासाठी या परिसरामध्ये ठिकठिकाणी फलक लावण्यात आले आहेत. सामाजिक संस्थांच्या वतीनेही पाणी, सरबत, चहा, नाश्ता देण्याची सोय़ करण्यात आली आहे.

साहित्य, शिक्षणाचा मंत्र..
प्रत्येक वर्षी चैत्यभूमीला शिक्षण आणि साहित्य यांच्या ओढीने राज्याच्या कानाकोपऱ्यातून आलेल्या प्रकाशक, नव्या उमेदीने-जाणिवेने लिहू लागणाऱ्या तरुणांकडून पुस्तकांचे, साहित्यविक्रीचे स्टॉल लावले जातात. यंदा या स्टॉलमध्ये मुंबई, पुणे, नागपूर, नाशिक, औरंगाबाद, अशा विविध शहरांतील प्रकाशन संस्थांच्या स्टॉलचा समावेश असेल. मराठीसह इंग्रजी, हिंदी तसेच प्रादेशिक भाषांमधील साहित्य इथे उपलब्ध असेल. कला, साहित्य, विपश्‍यना, धम्म या विषयांतील पुस्तकांचे स्टॉल लावण्याची तयारी सुरू आहे. विविध ठिकाणांहून आलेल्या संस्थांकडून सवलतीच्या दरात पुस्तकांची विक्री येथे केली जाणार आहे. पुरोगामी विचार, चळवळी, महापुरुषांची चरित्रे, स्पर्धा परीक्षांची पुस्तके यासोबतच भारतीय संविधानाची पुस्तके विक्रीसाठी ठेवण्यात येणार आहेत. डॉ. बाबासाहेब आंबेडकर यांची पुस्तके, महात्मा फुले, शाहू महाराज, महापुरुषांची चरित्रे असे विविध ग्रंथ विक्रीसाठी आणल्याची माहिती प्रकाशक देतात.

प्रेरणादायी संगीत
अक्षरांसोबत संगीताच्या माध्यमातूनही प्रबोधन करण्यासाठी चळवळीची गाणी, बाबासाहेबांचा जीवनपट मांडणाऱ्या प्रेरणादायी गाण्यांच्या सीडीची दमदार विक्री उद्या होईल, असे येथे स्टॉल लावण्याच्या तयारीवरून दिसते. बाबासाहेबांचे दुर्मिळ फोटो, पुतळे, छायाचित्र असलेले बॅचेस, गौतम बुद्धाच्या लाकडामध्ये कोरीव काम केलेल्या मूर्ती, पोस्टर घेऊन काही अनुयायी येथे आलेले दिसतात.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत