मायावतींची स्वबळावर लढण्याची घोषणा

लखनऊ : रायगड माझा वृत्त 

लोकसभा निवडणुकीपूर्वीच काँग्रेसच्या नेतृत्वाखालील महाआघाडीला घरघर लागली आहे. ‘भाजपला पराभूत करणं हे काँग्रेसचं ध्येय नाही. काँग्रेसला विरोधी पक्षातील घटक पक्षांना कमकुवत करण्यात अधिक रस आहे. त्याचाच एक भाग म्हणून बसपासोबत आघाडी करून बसपालाच संपवण्याचा डाव काँग्रेसने आखला आहे’, असा आरोप करत बहुजन समाज पार्टीच्या सर्वेसर्वा मायावती यांनी काँग्रेस आघाडीतून बाहेर पडत असल्याचं जाहीर केलं. यापुढे काँग्रेससोबत कधीच आघाडी करणार नसल्याचंही त्यांनी जाहीर केलं. त्यामुळे २०१९ पूर्वीच आघाडीत बिघाडी झाल्याने काँग्रेसचे धाबे दणाणले आहेत.


मायावती यांनी पत्रकार परिषद घेऊन काँग्रेस आणि भाजपवर जोरदार हल्ला चढवला. काँग्रेस दलितविरोधी पक्ष आहे. त्यांना पराभूत करणं गरजेचं आहे. गुजरातच्या निवडणुकांमधूनही काँग्रेसने काहीच धडा घेतला नाही. काँग्रेसचा सुंभ जळाला तरी पीळ जात नाही, अशी टीकाही मायावती यांनी केली. तसेच मध्यप्रदेश आणि राजस्थानमध्ये बसपा स्वबळावर निवडणुका लढणार असल्याची घोषणाही त्यांनी केली आहे.

दिग्विजय सिंह संघाचे एजंट

काँग्रेसच्या माजी अध्यक्षा सोनिया गांधी आणि काँग्रेसचे अध्यक्ष राहुल गांधी यांना बसपासोबत मनापासून युती करायची आहे. पण काँग्रेस नेते दिग्विजय सिंह सीबीआय चौकशीमागे लागेल या भीतीने युतीत खो घालत आहेत. त्यामागे त्यांचा स्वार्थ असून दिग्विजय सिंह हे आरएसएसचे एजंट आहेत, असा आरोपही त्यांनी केला.

मायावती काय म्हणाल्या…

>> भाजपचे महिला विरोधी धोरण, दडपशाही आणि उद्योगपती धार्जिण्या राजकारणाला विरोध म्हणून काँग्रेससोबत युती करण्याचा आम्ही निर्णय घेतला होता.
>> गेल्या निवडणुकीत जिथे भाजपची काँग्रेसबरोबर थेट लढाई झाली, त्या जागेवर भाजपने सहज विजय मिळवला आहे.
>> भाजपला एकट्याच्या ताकदीवर पराभूत करू हा काँग्रेसचा भ्रम आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत