राहुल गांधींना मानसिक आजार : भाजपची टीका

नवी दिल्ली : रायगड माझा वृत्त 

काँग्रेस अध्यक्ष राहुल गांधी यांनी पश्चिम बंगालमधील शारदा चिटफंड घोटाळ्याबाबतच्या आपल्या भूमिकेवरून ‘यू- टर्न’ घेतल्याचं सांगत भारतीय जनता पक्षाने राहुल यांच्यावर निशाणा साधला आहे. चिटफंड घोटाळ्याबाबत राहुल गांधी यांनी आतापर्यंत केलेल्या ट्विटचा आधार घेत भाजपने राहुल यांच्यावर आरोपांच्या फैरी झाडल्या आहेत. राहुल गांधी यांना दुभंग व्यक्तिमत्त्व आजार झाल्याचं म्हणत भाजपनं राहुल यांच्या नव्या भूमिकेची खिल्ली उडवली आहे.

‘दुभंग व्यक्तिमत्त्व विकारामध्ये व्यक्तीला आपल्यात कमीत कमी दोन व्यक्तिमत्त्वे असल्याचे जाणवते. यात काही घटना त्या व्यक्तीला आठवत नाहीत. ही दोन व्यक्तिमत्त्वे टप्प्याटप्प्याने पुढे येत राहतात. या आजारातून तुम्ही लवकरच बरे व्हा…’, अशा अर्थाचा मजकूर असलेले ट्विट भाजपने शेअर केले आहेत. यात चिट फंड घोटाळ्यावर भाजपने काँग्रेसचे आणि राहुल गांधींचे पूर्वीचे ट्विटही शेअर करत त्यांची भूमिका कशी बदलत गेली हे दाखवून देण्याचा प्रयत्न केला आहे.

पश्चिम बंगालमधील चिट फंड घोटाळ्यात २० लाख लोकांनी आपला पैसा गमावला असल्याचे राहुल गांधी यांनी ८ मे २०१४ रोजी म्हटले होते.

त्यानंतर दोनच वर्षांनी, २ एप्रिल २०१६मध्ये राहुल गांधींनी ममता बॅनर्जींवर टीकास्त्र सोडले होते. पश्चिम बंगालमधील शारदा चिट फंड घोटाळा हा देशातील सर्वात मोठ्या घोटाळ्यांपैकी एक असून त्याबाबत ममता बॅनर्जी यांनी चकार शब्दही उच्चारलेला नाही, असे राहुल यांनी म्हटले होते. भाजपने राहुल यांच्या या ट्विटला वर्तुळ काढत, आता मात्र ममतांना पाठिंबा जाहीर करत राहुल यांनी यू-टर्न घेतल्याचं दाखवून देण्याचा प्रयत्न केला आहे.

भाजपनं राहुल यांचे १९ एप्रिल २०१६चे एक ट्विट देखील शेअर केले आहे. आपण भ्रष्टाचार रोखू असे ममता बॅनर्जी म्हणाल्या होत्या. मात्र त्याविरोधात कारवाई करायचे सोडून त्या बंगालला लुटणाऱ्यांना वाचवण्याचे काम करत आहेत, असे राहुल यांनी ट्विटमध्ये म्हटले होते.

काही दिवसांनंतर २३ एप्रिल या दिवशी राहुल यांनी आणखी एक ट्विट शेअर केले होते. ते या ट्विटमध्ये म्हणतात, ‘ पश्चिम बंगालमध्ये सिंडिकेट राज आहे…. माफिया राज आहे.’ २०१६च्या विधानसभा निवडणूक प्रचारादरम्यान राहुल यांनी हे वक्तव्य केले होते.

लोकसभा निवडणूक जवळ येत असताना भाजप नेत्यांनी ममता बॅनर्जींना लक्ष्य करणे सुरू केले आहे. त्या प्रमाणेच काँग्रेस अध्यक्ष राहुल गांधीही भाजपच्या निशाण्यावर आहेत.

शारदा चिट फंड घोटाळ्यावरून ममता बॅनर्जी यांच्यावर टीका करणारे काँग्रेस अध्यक्ष राहुल गांधी यांनी आपल्या भूमिकेपासून कोणत्या कारणांमुळे यू-टर्न घेतला ते त्यांनी देशाला सांगावे, असे आवाहन केंद्रीय मंत्री रविशंकर प्रसाद यांनी राहुल गांधी यांना केले आहे.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत