हॉटेलांमधून कांदा गायब; हॉटेल मालकांनी दरवाजावर लावले पोस्टर

वाराणसी: महाराष्ट्र News 24 वृत्त

कांद्याच्या किंमती गगनाला भिडल्या आहेत. त्यामुळं हॉटेलात कांद्याचा वापर कमी केला आहे, असं एका हॉटेल मालकानं सांगितलं. भाजीसाठीची ग्रेव्ही सुद्धा कांदा-लसूणऐवजी काजूपासून तयार केली जात आहे, असं त्यांनी सांगितलं. गेल्या एक-दोन दिवसांपासून कांद्याचे दर कमी होऊ लागले आहेत. काही दिवसांनी किंमती आणखी कमी होतील, असं लोकांना वाटतंय. आगामी दिवसांत कांद्याच्या किंमती कमी होऊन सर्वसामान्यांना दिलासा मिळेल, अशी आशाही त्यांनी व्यक्त केली.

कांद्याचे दर गगनाला भिडले आहेत. वाढत्या दरांनी सर्वसामान्यांचेच नव्हे, तर हॉटेल मालकांचेही कंबरडे मोडले आहे. महाग झाल्यानं हॉटेल, रेस्तराँमधूनही कांदा गायब झाला आहे. कांदा मागून आम्हाला लाजवू नका, कांद्याऐवजी मुळा घ्या, अशी विनंती करणारे पोस्टर हॉटेल मालकांनी दरवाजावर लावले आहेत.

कांदा महागल्यानं सर्वसामान्यांचे बजेट कोलमडले आहे. काही शहरांमधील हॉटेल, रेस्तराँ आणि स्वयंपाकगृहातून कांदा जवळजवळ गायब झाला आहे. हॉटेलवाले तर दरवाजावरच पोस्टर लावून कांदा मिळणार नाही, असं सांगत आहेत. वाराणसीतील काही हॉटेल मालकांनी पोस्टर लावून कांद्याऐवजी मुळा घ्या, कांदा मागून आम्हाला लाजवू नका, अशी विनंती केली आहे. सध्या वाराणसीमध्ये कांद्याचे दर प्रतिकिलो १०० रुपयांच्या वर पोहोचले आहेत.

सूत्रांनुसार, १५ डिसेंबरनंतर आयात केलेला कांदा बाजारात येईल. महाराष्ट्र आणि गुजरातमधील नव्या कांद्याचीही आवक वाढण्यास सुरुवात होईल. याशिवाय सरकारनं एमएमटीसीच्या माध्यमातून ३० हजार मेट्रिक टन कांदा आयात करण्याचा निर्णय घेतला होता. त्याची आवक २७ डिसेंबरपासून सुरू होणार आहे. त्यामुळं येत्या काही दिवसांत कांद्याचे दर आवाक्यात येतील, अशी आशा व्यक्त केली जात आहे.
उत्पादन घटल्यानं कांदा भडकला!
देशात कांद्याचे उत्पादन कमी झाल्यामुळे कांद्याचे दर वाढले असल्याचे कृषिमंत्री नरेंद्रसिंग तोमर यांनी लोकसभेत सांगितले. कांद्याचे दर वाढल्यानंतर त्याच्या निर्यातीवर बंदी आणली गेली आणि आयात करण्याचे आदेश देण्यात आले असल्याची माहिती तोमर यांनी दिली. राज्यांच्या मुख्यमंत्र्यांनाही कांद्याचे दर नियंत्रित करण्यासाठी पावले उचलण्यास सांगितले गेले असल्याचे तोमर म्हणाले.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत