१० टक्के आरक्षण ही विरोधकांना मोठी चपराक: पंतप्रधान मोदी

सोलापूर : रायगड माझा वृत्त

‘आरक्षणाच्या मुद्द्यावरून देशात आतापर्यंत खोटा प्रचार करून लोकांची दिशाभूल केली जात होती. सामान्य वर्गातील गरिबांना आरक्षण देण्यासाठी हे सरकार दलित, आदिवासी आणि ओबीसींच्या कोट्यातून काढून घेणार असा प्रचार केला गेला. मात्र, गरीब सवर्णांना १० टक्क्याचं अतिरिक्त आरक्षण देण्याचा निर्णय घेत आम्ही खोटा प्रचार  करणाऱ्यांना चपराक लगावली आहे’, अशा शब्दात पंतप्रधान नरेंद्र मोदी यांनी विरोधकांवर हल्लाबोल केला. गरीब सवर्णांसाठी १० टक्क्यांच्या आरक्षणाचा निर्णय घेऊन आता कुणीही कुणाचे काहीही काढून घेऊ शकणार नाही हेच दाखवून दिल्याचंही पंतप्रधान मोदी म्हणाले. ‘आमच्या या निर्णयामुळं खोटं पसरवणाऱ्यांना आम्ही असा काही धक्का दिला आहे की, खोटं पसरवण्याची त्यांची ताकदच नष्ट होऊन जाईल’, असा टोलाही त्यांनी लगावला.

विविध विकासकामांचे उद्घाटन आणि भूमिपूजन कार्यक्रमासाठी पंतप्रधान मोदी सोलापूरात आले होते. या कार्यक्रमात उपस्थितांना संबोधित करताना पंतप्रधान मोदींनी आपल्या सरकारची पाठ थोपटत मागच्या काँग्रेस सरकारवर हल्लाबोल केला.

‘मिशेलमामाशी कोणाचे संबंध आहेत?’
राफेल प्रकरणी काँग्रेसनं मोदी सरकारला घेरण्याचा प्रयत्न केला असला तरी पुन्हा एकदा मोदींनी काँग्रेसवर पलटवार करण्याचा प्रयत्न केला. लढाऊ विमान करारात मिशेलची भूमिका अत्यंत महत्त्वाची होती, या मिशेलमामाशी कोणाचे संबंध होते याचं उत्तर काँग्रेसला द्यावं लागेल, असं म्हणत पंतप्रधान मोदी यांनी काँग्रेस अध्यक्ष राहुल गांधी यांच्याकडे उंगुलीनिर्देश केला.

‘देशात १० वर्षं रिमोट कंट्रोलवालं सरकार होतं’
सोलापुरात बोलताना पंतप्रधान मोदी यांनी काँग्रेसवर चौफेर हल्ला चढवला. आमच्यापूर्वी दिल्लीत १० वर्षं रिमोट कंट्रोलवालं सरकार होतं. काँग्रेसच्या सरकारनं १३ लाख घर बनवण्याचा केवळ कागदावर निर्णय घेतला. इतक्या मोठ्या देशात १३ लाख घरं म्हणजे काहीच नाही. त्या सरकारनं काम मात्र केलं केवळ ८ लाख घरांचं. १० वर्षात ८ लाख घरं. म्हणजेच १ वर्षात ८० हजार घरांची निर्मिती. मोदी सरकार पाहा , एकट्या सोलापुरात ३० हजार घरांची निर्मिती होत आहे. साडेचार वर्षात आम्ही ७० लाख शहरी गरिबांच्या घरांना मंजुरी दिली. ४ वर्षात १४ लाख घरं बनवली. लवकरच ३७ लाख आणखी घरं बनतील, अशी माहिती देत त्यांनी आपल्या सरकारच्या कामगिरीची प्रशंसा केली.

पंतप्रधान मोदी यांनी सोलापुरात आज राष्ट्रीय महामार्ग क्रमांक ५२चं उद्घाटन केलं. याबरोबरच पंतप्रधानांनी ड्रेनेज लाइन सुविधा आणि समांतर जलवाहिनीच्या कामाचं भूमिपूजन केलं. आमचे सरकार येण्यापूर्वी देशात ९० हजार किमीचे महामार्ग होते. आता ते १ लाख २३ हजार किमीचे झाले आहेत. याचाच अर्थ गेल्या साडेचार वर्षांत आम्ही ४० हजार किमीचे महामार्ग बनवले अशी माहिती देत मोदी यांनी आपल्या सरकार अधिक कार्यक्षम असल्याचं ठासून सांगितलं.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत