१३ जणांचा बळी घेणारी नरभक्षक टी-१ वाघीण अखेर ठार

यवतमाळ : रायगड माझा वृत्त 

मागील दीड वर्षापासून १३ जणांचा बळी घेणाऱया टी-१ वाघिणीला ठार करण्यात अखेर वनविभागाला यश आले आहे. शुक्रवारी रात्री वाघिणीचा शोध घेणाऱ्या पथकावर चालून आल्याने तिला गोळी झाडून ठार करण्यात आल्याची माहिती वन विभागाच्या सुत्रांनी दिली आहे.

बोराटीच्या जंगलातील नाल्यालागत या वाघिणीला ठार करण्यात आले आहे. कक्ष क्रमांक १४९ चं शोधपथकातील शिकाऱ्याने वाघिणीला बेशुद्ध करण्याचा प्रयत्न केला. पण आक्रमक झालेल्या वाघिणीने शोध पथकावरच हल्ला चढवल्याने तिच्यावर गोळी झाडून ठार करण्यात आलं. परंतु आता तिच्या ११ महिन्यांच्या दोन बछड्यांना जिवंत शोधण्याचं आव्हान वनविभागासमोर आहे. वाघिणीला ठार करण्यात आल्यानंतर पंचनामा करुन तिला नागपूरला हलवण्यात आले आहे. नागपूरमध्ये या वाघिणीचे गोरेवाडा पशू केंद्रात राष्ट्रीय वाघ संरक्षण प्राधिकरणाच्या नियमांनुसार शवविच्छेदन करण्यात येणार आहे.

गेल्या दोन वर्षांपासून २२ गावातील २५ हजारांच्यावर गावकरी वाघिणीच्या दहशतीत होते. नरभक्षक वाघिणीला जेरबंद करण्यासाठी मागील काही महिन्यांपासून शर्थीचे प्रयत्न सुरू होते. वाघिणीला पकडण्यासाठी मध्यप्रदेशातून चार हत्ती आणण्यात आले होते. वाघिणीला जेरबंद करण्यासाठी आणलेल्या एका पिसाळलेल्या हत्तीनेच महिलेला ठार केल्याची घटना घडली होती. त्याचबरोबर ५ शार्पशुटर, ३ मोठे पिंजरे, ५०० वन कर्मचाऱयांची फौज वाघिणीचा शोध घेत होती. तसेच पॅराग्लायडरच्या मदतीने हवाई शोधदेखील घेण्यात आला होता. परंतु या सर्व प्रयत्न निष्फळ ठरले होते. इतकच नव्हे तर वाघिणीचा शोध घेण्याच्या मोहिमेत गोल्फपटू ज्योती रंधावा यांच्या दोन इटालियन कुत्र्यांचीही मदत घेण्यात आली होती. तरीही वाघिणीचा शोध लागत नव्हता. ग्रामस्थांचा एकावर एक बळी जात असताना सुप्रीम कोर्टानंही वाघिणीला जेरबंद करा किंवा ठार मारा, असा मुख्य वनसंरक्षकांचा आदेशही कायम ठेवला होता. अखेर शुक्रवारी रात्री उशिरा या वाघिणीची दहशत संपुष्टात आली.

शेयर करा

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत